ГIибрат касеси
ГIибрат касеси
«Ливерпуль» футбольный клубла футболист Садио Мане халадеш агарси, гапхIейкIуси адам сайливан валуси сай. Амма илала устадеш диганти дебали тамашабиубтири илини экран пIякьбикибси Айфон пайдалабирухIели. ХIятта илини илдигъунти 150 гаджет жумягIли исести арц кайсули виалра.
Синегаллан Садио Мане гьарли-марси бусурман сай, ва гьарил тап бетахъибхIели, вяхIудиикили, Аллагьлис ﷻ шукрула сужда бируси сай.
«Ливерпуль» «Лестерличи» къаршили дурабуркIуси машгьурси футболла абзличиб илини яргаличилси тап бетахъибси бархIи, ил мерла мижитлизив хIяжатханаби умудирули чеибсири.
Чумал дус гьалаб «Ливерпуль» 4:0 счетличил чедибикибхIели, операторла кадрлизи викибси Садиола някълизиб экран бячунси телефон хIисаббарибти хIербикIути тамашабиубтири.
Илала дусла алапа 7, 8 миллион фунт стерлингов саби. 29 дус виубси футболист гьалавра викIусири сунени касибси бяркъ хIясибли «давла» ибси девла мягIнали дебали халаси мер бурцниличила.
«Се дирути наб 10 «Феррари», бриллиантла 20 сягIят яра 2 самолет? Илди секIултани наб яра дунъялис се гIяхIдеш лебхуси?», – викIар Мане.
«Нуни кьалли балас гаши се сарил, наб авлахъличив узесра кьадарбиубсири, къиянти замунтира чедаира, цайкьяшмачил футболли виркьаси, дила я багьуди ва дахъал цархIилти секIал аги. Амма ишбархIи нуни кайсути арцла кумекличибли дила цаванзалантас кумекбарес имканти лер», – баянбариб Манени.
«Нуни кумекбарира школаби, стадионти тIашдатахъес. Нушани палтар, дабри, берк-бержла продуктуни мискинтас диахъулра. Илала дурабадра нуни гьар базлис 70 евро дедлугути сари лебилра нушала регионна мискинтас, илдала хъалибаргунас кумекбарес или.
Наб гIягIнидеш агара дурхъати автомобильти, хъулри ва самолетуни асили, уркIи халабаахъили, пайдаладирес. Наб дигулра ЧевяхIсини наб гибсилизибад камси-биалра халкьличира баахъес».
Ил валути адамти илала илцадра рухIласи умудешли ва иш дунъяла лигIматуначивад гьарахъли виънили тамашабирули бикIули саби: «ХIерая, Садио Манеличи... Суненира гьар жумягIли кайсуси, халаси алапаличи хIерхIеили, ил цацабехIтиван сунела телефон сагабарес или пикриикIули ахIен. Нуша-ургаб биалли леб адамти, хIянчи хIебиаллира сагаси «Айфон» тIалаббирути».
МягIнакIун давлализиб ахIен, бекIлибиубси рухIласи давла саби. Илизибад саби дигахъуси адамлис дигусила ва гьарли-марли гIягIнисила кьимат. Адамти мурталра дигуси секIал асес или хьулбикIули бирар, чус илцад-декIар хIяжатли хIебиалра. Яра цархIилти адамтала чебаибсиличи абзбикили дурхъаси секIал ису, чус гьарли-марли гIягIниси хIебиалра.
Ишаб илала хIекьлизиб дурхъаси хIядис гьанбушес дигулра: «ЧевяхIси Аллагь ﷻ хIушала чарх-бекIличи я палтарличи ахIен хIерикIуси, уркIиличи сайну».
Мас-давла лебли или халамадурхудая, гапмайкIудая, садакьа биреная.
СенкIун лебдеш, давла-мас адамлис Аллагьли ﷻ саби лугуси, ил багьандан мискинтасра камси-биалра бутIа бедлугнили адамла даража гьатIира ахъбируси саби. Хъуммартидая иличила...
