ДИН ВА НУША

ДИН ВА НУША

Мубарак

Дагъистан Республикала Муфтий шайх ГIяхIмад Афандини улкала халкь чесабаибси дурхъаси Рамазан базличил мубаракбариб

«Ассаламу гIялайкум ва ряхIматуЛлагьи ва баракатугьу! ХIурматла нушала узби ва рузби! УркIи-уркIиларад мубаракдирулрая дурхъаси Рамазан баз бехIбихьниличил. Ишгъуна баракатла манзиллизиб, тиладибирулра ца минуталра убхIебатурли, гьатIира халаси къайгъиличил гIяхIти баркьудлуми дирахъес, цаличи цали уркIецIибирули, гьар шайчибад кумек гIеббиахъес, дугьбачил биаб, баркьудиличил биаб – бегIлара гъамтасцун ахIи, лебилра къиянси аги-кьяйдализи бикибтасра бархли. АхIерти узби ва рузби, Рамазан баз – ил гIяхIти баркьудлумала, умувирнила, сабурла ва уркIецIила манзил саби. Ил багьандан, даширая, гIяхIти баркьудлуми имцIали дурадуркIехIену. ЧевяхIси Кьудратла ВегIлизи тиладибирулра бусягIятла къиянси замана нушала уркIи чIумабиахъес, иман цIакьбиахъес, дагьри умудиахъес ва сагъдиахъес.

ЧевяхIсини икьалабараб иш баракатла манзил чебетаибси гIибадатлизиб беркIахъес. Нушала дуббуцари лерилра бунагьуназирад умударесили ва нушала бунагьуначирад чевверхесили биаб. Улгулра нуша акIахъубси РяхIмучевси Аллагьлизи ﷻ сунела баракатли ва уркIецIили гIердуцахъес, нушала гIяхIти мурадуни ва кьасани гIямрулизир детерхахъес нушаб цIакьани гахъес. Даширая, нушала ВатIайс къиянси манзил цалис ца дулгехIену, цалис цали кумекбирес, хIурматбирес, гIибрат чебиахъес ва бегIлара мягIничебси - нушаб гибти лигIматунас ЧевяхIсилис шукру бирес! ЧевяхIси Аллагьлизи ﷻ тиладибирулра нушаб лебтасалра сабур гахъес, ишди дурхъати бурхIни нушаб баракатчертили диахъес, излумазирад сагъдарахъес, балагьуназирад ва питнабазирад мяхIкамдарахъили дерцахъес. Амин!

Дуббуцарла дурхъадеш

АхIерти динна узби ва рузби, хIурматла дарганти! УркIи-уркIиларад дурхъаси Рамазан базличил дила ва лебил лебил «АС-САЛАМ» газетала редакцияла шайзирад мубаракдирулрая!

Ил баз дусли гьачам башуси, амма сунезир дахъал лигIматуни лерси баз саби. Рамазан базлизиб сабри нушачи Дурхъаси Кьуръан хьурабарибси. Ил базлизир ЧевяхIси Кьудратла ВегIли алжанала унза гьаргдирути сари, жагьаннабла унза биалли, гIеркIути сари, адамти бархьси гьунчибад чебхIебалкIахъес багьандан. Гьайгьайрагу, ил базличи гьала хили хIядурдеш барес гIягIнибиркур, вегIлизирад кадикибти бунагьуначи пашманиубли, тавбадарили, ЧевяхIси Аллагь ﷻ чевверхахъес тиладиикIес чебиркур. Ил базлизиб гъамти-тухумти, разибирули, садакьа буртIули, дирути гIяхIдешуни имцIадирули беркIахъес маслигIятбирули саби. Илкьяйдали шаригIятлизир далхIедикибти гъаймез датурли, хIярамсиличивад гьарахъикили, хIулби, лихIби, лезми ва цархIилти кьаркьа биркIантира къадагъалати секIайзирад мяхIкамли дихIес чебиркур. Рамазан базла дуббуцари – ЧевяхIси Кьудратла ВегIла адамтас халаси савгъат саби.

МухIяммад Идбаглизибад ﷺ нушачи баахъибси хIядислизиб бурили саби (мягIна): «Эгер адамтани Рамазан базлизир чучи хIерти лерилра гIяхIдешуни ва лигIматуни далути диалри, илдас ил баз даимлис бухъянбитIахъес дигахъи». Аллагьу ТагIялани дуббуцари илцадра дурхъабарибси саби, сенахIенну ил дигIянаси гIибадат сабхIели ва декIли зягIипсилис ахIи, багьана агарли ил батес асухIебирар. Рамазан базла кьадриличила бурули нушала Идбаг ﷺ викIули сай: «ЧевяхIси Кьудратла ВегIли дила умматлис гьаларти умматунас хIедедибти дахъал лигIматуни дедибти сари». Динна гIялимтани бурни хIясибли, Лайлатуль Кьадрила дуги Рамазан базла гIергъити бурхIназиб баргес вирар. Ил дуги азир базличиб дурхъаси саби ва ил балгадугIялизиб беркIни дурхъали чебиули саби. Марлира, Рамазан базлизир дарибти балгнас, гIяхIти баркьудлумас жаваб чарбалтуси саби, барибси садакьа кьабулбируси саби, гIяхIти гIямалти чуйналра имцIадарили, гIязабти чераркути сари.

Дуббуцарла дахъал хIикматуни лерти сари, ил хIясибли, ЧевяхIси Аллагь ﷻ багьандан саби ил дуббурцуси. Нушачир черти лерилра дирахъес ва дуббуцари дуцахъес икьалабараб Аллагьли I. Даширая, нушанира иш дурхъаси баз пайдалабарили, балга-дугIяра, дехIибалара, дуббуцарира чедетаахъили Аллагь ﷻ разили калесли дирехIену. Дурхъаси базла хIурмат багьандан нуша-ургар дигира, иманра имцIадиаб, ЧевяхIси Аллагьли ﷻ нушала лерилра гIяхIти баркьудлумира дуббуцарира кьабулдараб! Амин.

НАИДА ГЪУРУЕВА