ГIямрула багьа
Ца пулан адамли кьасбариб дахъал арц учидяхъили давлачеввиэс. Ил бамсриагарли узулри, хIятта палтар-кьяшлис ва беркесилисра арц харжхIедирули. ЧевяхIсилис бируси гIибадатличилара бекIлил хъумартурли, арадешагарвиублири.
Ил ВатIан бархьбатурли, урхIла улкализи арякьун. Ил мурталра сунези сай викIусири: «Ну давлачеввирус, гIур биалли бамсриихъис, жагати палтарра исис, бизиси хурегра букас, разили, лебтачивра гIяхIли хIерирус, итхIели, Аллагьлисра улгес вехIирхьус».
ХIера, бамсриагарси бузериличил илини халаси давла учибяхъиб. Ца дуги илини сунела лебдеш халбариб ва харивиуб, гьанна ил гьарли-марли давлачевлири! ИлхIели илини кьасбариб савлиличивад вехIихьили давлачев кьяйда, сунес дигусиван хIервирес.
Савли айзурмад, иличи бебкIала малаик ГIизрагIил вакIиб ва рухI касес замана баили саби или буриб. ИлхIели мурул адам ца дусалра ватахъес тиладиикIесииб, амма малаик кьабулхIейкиб. ГIур илини тиладибариб хIябал бархIилра ватахъес, малаик илхIелира кьабулхIейкиб. Давлачев тиладиухъун давла бурчули, бахъхIи чехIебаибти гъамти чебаайчи ца бархIилра ватахъес, ГIизрагIил кьабулхIейкиб. Адамли тиладибариб сай аркьниличила гъамтази бурайчи ца сягIяталра ватахъес, гIяхIдеш хIебиуб. ИлхIели илини ца-кIел минутли кагъар белкIайчи калахъес тиладибариб. БебкIала малаик разиикиб. Илини белкIун: «Дила ахIерси урши! Халаси къиян кабихьили, ВатIа дурав, ЧевяхIсилис гIибадатличила ва дунъяла лигIматуначила хъумартурли, лерил нуни дучибти арцлис нуни гIямрула ца сягIяталра асес хIейубра. Дила хатIа тикрармабирид, гьарил минут мяхIкамбирули, даимси дунъяличи хIядурикIен ва иш дунъялис хIу виргIямайруд. Арц дучес гъазализи викили ну Ахиратла лигIматуни дучес бажардихIейкнилис жагьаннабла цIализи виркули ургус. Давла бучес кьасли нуни иш дунъяла гIяхIдешунира чехIедаира. Багьи, ну виргIявиубра: «Арц диалли, гьар секIал асес вирар» ибти дугьбани. ХIякьикьатлизиб биалли, ургIебли уббухъун.
Нуни аргъира: арцлис асес вирар буруш, амма гьанкI хIейрар, беркеси вирар, иличи иштяхI биалли, хIейрар, тухтурти ва дармунти асес вирар, арадеш биалли, хIейрар. Сецад-дигара къуллукъчиби, къаравашуни вирар асес, гьарли-марти юлдашуни - хIейрар, хьунул адамти вирар, марти дигай – хIейрар. Хъали тIашбатес вирар, ванаси анкъи биалли, хIейрар, лигIматуни вирар, разидеш — хIейрар. Багьуди асес вирар, гIякьлу — хIейрар. Дила урши, дила хатIаби тикрармадирид!»
ХIЯДУРБАРИБСИ - НАИДА ГЪУРУЕВА
