Палтар челгьнила адабуни
Бусурман адамла палтар гьарзати диэс чебиркур, кьаркьала гъяжхIебирути, гIяхIси саби илди цIуба рангла диалли. Дебали духъянати палтар дихахъесра маслигIятбирули ахIен. Палтар жагали дихес ва мурталра умули дихIес чебиркур.
Палтар челгьес балуй шайчивад вехIирхьуси сай. Палтар челгьухIели ишкьяйда бурахъес маслигIятбируси саби:
«Аллагьумма инни асьалука мин хайригьи ва хайри ма сунигIа лагьу, ва агIузубика мин шарригьи ва шари ма гьува лагьу» яра «АлхIамдулилагьи ллази касани ма увари бигьи гIаврати ва атажаммалу бигьи байна ннаси» (Деза Аллагьлис, дила гIяврат кIапIбарахъес наб палтар гибси, адамтала ургав ну илдани жагаварилра).
Палтар чердалтухIели бучIуси саби: «Бисмиллагьи ллази ла илагьа илла гьува».
Палтар челгьес ва чердалтес адамта чехIейуси мерличир чебиркур.
Сагати палтар челгьухIели бучIуси саби: «Аллагьумма лакал хIамду, анта касавтанигьи асъалука хайрагьу ва хайра ма сунигIа лагьу, ва агIузу бика мин шаригьи ва шарри ма сунигIа лагьу».
МягIна: (Я Аллагь. ХIед деза, ХIуни набчи ил чегьурри. Нуни тиладибирулра ил хIези вайсизибад мяхIкамбарахъес).
Сагаси палтар асибхIели, буркьа палтар садакьалис бедлугахъес маслигIятбируси саби, багьа агарли, иличи хIяжатдеш лебсилис.
ЖумягIла дехIибала дарес аркьухIели гIяхIтигъунти палтар челгьахъес маслигIятбируси саби. Мурул адамлис архIя чIянкIилизирад дирбубти палтар дихахъес къадагъабируси саби. Хьунул адамтас илди дихес асубируси саби. Хьунул адамла палтарли илала лебилра кьаркьала кIапIбирули биэс чебиркур, дяхIра някъбира (хъат някъби) ахIенси, илдани шала батиэс асухIебирар, кьаркьала чехIебиахъес багьандан. Кьаркьайчи цIапакунтира палтар дихути ахIен, илкьяйдали мурул адамла палтарличи мешутира.
Пикри бяхIчиаая илди авалра секIайчи. Модала палтар бусурмантачи лайикьти ахIен. Палтарла шайчирти кьанунти пикридиран гьарли-марли шайтIан саби. Мода барсбикIуси саби, амма адамла палтарличи тIалаб мурталра кавлуси саби.
Палтарлис кадизахъурти дазурбачила гъай бетаурхIели, Муслимли нушачи баахъибси дирхалачебси хIядис гьанбиркахъес чебиркур. Илизиб бурили саби Кьиямалла бархIи гъамбикIуцад хьунул адамти палтарличил сабли хьалли, гьаргли башар, илдигъунти хьунул адамтани Алжанала тIемра чехIебиу, хIятта ил гьар шайчибяхI тIинтIбируси биаллира. Ил багьандан хIушанира хIушала хьунри, рурсби, дурхIни мяхIкамбарая илгъуна кьисматлизибад.
