ШайтIа 9 дурхIя
«Маракьиль гIубудия» бикIуси жузлизиб бурули саби, иблисла 9 дурхIя лебни, илдазибадли гьарилли, адамти бархьси гьунчибад чеббулкIахъес чус хасси хIянчи чесибти саби.
Иблисла дурхIназибадли саби Ханзаб, илини Адамла u дурхIни дехIибайчиб чеббулкIахъути саби. ГIур саби Валгьан, илини адамти дазала дирухIели чеббулкIахъути саби. ГIергъиси дурхIя саби Заланбур, илини вачрукьянаби чеббулкIахъути саби, илдази чула вачарла масла агарти сипатуни дурахъули, къянала хъя бирахъули, умцантачиб адамти биргIябургахъули, чеббулкIахъуси. ШайтIунтазибадли саби АгIвар, ил адамтази зина барахъес бузуси саби. УрхIла мурул адамра, хьунул адамра мякьла кабиибхIели, АгIвар илдачи гъамбиубли, илдала гIявратличи уфируси саби, илхIели мурул адамра, хьунул адамра цаличил ца пикрибикIути саби, цалис цали лишанти дирути саби, ва ахирра илдала ургаб зина бетаруси саб. ИлхIели АгIварла мурад бетаурли бирар.
Леб шайтIан Васна бикIуси, илини бусути адамти заманаличиб ахIебизахъес къайгъибиру. Савлила дехIиба замана баибхIели, яра хъатIила дехIибала хIедарили кайхьунхIели, дехIибала дарес ахIейзахъес Васнани адамла бекIра, хIулбира декIдирахъу. Бурни хIясибли, адам ахIейзахъес Васна илала хIулбачи дурабурхуси саби, ил багьандан адамли хIулби абхьес хIейрули рурцIути сари. Урег-ибил шайтIан Батар саби. Илини адамти къияйзи бикибхIели сабурлизибад булхъахъути саби, бакIибси Аллагьла ﷻ кьадар сабни хъумуртахъуси саби, илди чIярбикIахъу, бисахъу, чула кьаркьайчирти палтар гъяриахъу, бяхIлизи бирхъяхъу, бекIла гъез къябдирахъу. Иблисла дурхIназибадли саби Дасим бикIуси шайтIан. Адам кьацIли укухIели, «бисмиллагь…» хIеалли, Дасим иличил барх букар, хъули ухIнаулхъухIели «агIузу биллагь…бисмиллагь…» хIеалли, Дасим иличил барх бухIнабулхъан, усес калхьухIели Аллагьла ﷻ уличивли кахIейхьалли, барх Дасимра кабилхьан. ГIуррара бурули саби, адам сунела хьунуйчи гъамвирухIели, «бисмиллагь …» хIеалли, Дасимра муруйчил барх хьунуйчи гъудурбиубли, итини касибсигъуна суненира кайсу.
Адамли палтар чердатурли, илди дергурли кахIедихьили, «агIузу биллагь…», «бисмиллагь…» хIеалли, Дасимли илди палтар чегьурли, илдазибад тIягIям кайсу, ва илди палтар жявли удар. Иблисла дурхIназиб леб шайтIан сунени адамтазиб агарси бурахъуси, адамти-ургар фитнаби тIинтIдируси, бахъли ца гIяйиблавиру, амма итичиб гIяйиб хIебирар. Иблисла дурхIназибадли урчIемэсил саби Абьяд. Ил къайгъилизиб бирар, барес имкан агарси секIал барес. Илала хIянчи саби идбагунира, расултира чеббалкIахъес, амма ил барес сунезиб ахъри агара, сенахIенну идбагунира, расултира Аллагьли ﷻ бунагь-хатIабазибад берцахъибти саби. ХIушанира къайгъибарая шайтIунтазирад мяхIкамдеш барили, мурталра дазайчил дирес ва хIуша акIахъубси Кьудратла ВегI гьаниркахъес.
«Маракьил гIубудия» жузлизибад.
