Хургьри – Аллагьли ﷻ гибси чебяхIси савгъат
Хургьри – Аллагьли ﷻ гибси чебяхIси савгъат
Халали ахIенси хIялумцIла дураберкIахъес маслигIятбирулра. Къянкъра мухIлира кьяпIдарая ва гьигь тIашаая. Гьу, къияннив? ГIяндайкесра асубираргу ил хIяйчив имцIали калалли.
Сегъуна халаси гIяхIдеш барилил нушаб Кьудратла ВегI Аллагьли ﷻ гьигьдикIахъес имкан гили! Нуша гьигьдикIути хургьри биалли Аллагьли ﷻ тамашалис акIахъубтигъунти сари. Хургьри нуша вяшдикIниличил уржили дархдаси дузути сари. Нуша дуцIдухъунхIели, хургьрира къалабали дузескадирар ва нушаб гьаваличи хIяжатдеш гIягIниси даражаличиб гIеббурцу. ХIуша паргъатли кадиибхIели кислородличи хIяжатдешра халаси ахIен, илхIели хургьранира чула дузни хIярхIбирули саби. Амма нушаб гьигьдикIес багьандан хургьри лерницун баибси ахIен. Хургьри дузахъес икьаладирути дурарадти цIакьанира хIяжатти сари. Шалила лигубалачирти гIемснала бузери хIяжатси саби, диафрагмалира хургьри дузни низамличи биркахъули саби.
Даширая нуша нушачи хIердилзехIе сегъунти саррал нуша гьигьдикIухIели багьес багьандан. Гьигь бухIна супIбирухIели шалила лигуби дурадяхI ахъдирули сари. ИлхIели шалила лигубала удибси диафрагма гъяжбирули саби. Хургьрани гьигьла кьакьарлизибад гьава бухIнабяхI супIбирули саби. Гьава дурайухIели нушала шалила лигубира гIяшкадирули сари ва диафрагма ахъбирули саби. Хургьри гъяждиубхIели, илдазибси гьава дурабулхъули саби.
ДуцIикIес, дукаркIес, вашес, кайхьес... Лерилра илди хIушани пикрилра хIедухъи дирес дирулра. ИлхIелира хIушала хургьри чула сари дузули сари ва хIушаб дигуси бирахъес имкан лугули саби. ГьигьикIниличи хIеруди бузахъни сунела саби бетурхули саби, нушала бутIакьяндеш агарли. Нуша вяшдикIухIели хургьрала бузерира жигарчеббирули саби. Харжбируси гьунарра илхIели, гьайгьайрагу, имцIабирули саби. Адамла кьаркьайзирти даршал триллионничир имцIали лерти клеткабас вяшдикIухIели гьавара имцIали хIяжатбиркули саби. Кислородличи хIяжатдеш имцIабиубхIели, кьаркьайзибад дурайуси углекислий газла кьадарра имцIабирули саби. ХIяжатси кьадарлизиб кислород гIеббурцули хIебиалли, илхIели кьаркьайзирти лерилра клеткаби вайтIа дузескадирар. Ил багьандан саби нуша гьигьдикIни къалабабируси.
Лерилра илди хIянчи дирути сари чумилра биркIан дарх цадалги дузниличил. БекIла мехIелизиб кьаркьайзибси кислород хIяжатси даражаличиб гIеббурцниличи хIеруди бузахъуси центр леб. Илини хIилизиб сецад кислород лебал хIеруди биру. Къалабали гьигьикIнилисра дазу лебси саби, ил гьатIира имцIабарес хIейэси даражаличи абикибхIели, адам жапаси хIяйчи виркур. Илди хIянчи лерилра гIямрулизир дугилира хIерилира тIашбизни агарли детурхути сари. БекIлил тIашаэс асубирули ахIен.
Чинар сари гьатIи ил къиянси ва дурусси хIянчи бетурхниличи тIашбизни агарси хIеруди бузахъути компьютерти? Чинара ил балбирути цIакьани ва устни? Адамла гьигьикIнила система Кьудратла ВегIли адамлис дедибти тамашала биркIунтазибад ца саби. Илди нушала кьаркьайзир чум лера ва секьяйда дурусли дузули?! Ил барес виубси Аллагь ﷻ ЧевяхIси сай, нуша илис мурталра баркалла дикIес гIягIнитира.
