Умматла децI

Умматла децI

Дусмадли бухъянбитIунси бижгурдеш бусягIятла замана сагадан ибкьси агиличи бикили саби. Илала асурти сабабли лебил Ближний Востокла регион къиян-жапализиб саби, лебил дунъя паргъатагарбиубли саби. Алхунтала лугIи гьар бархIи имцIабикIули саби.

Ил биалли гьалабал бехI-бихьибсири: цацабехIти жугьу-тIунани саби бегIси пачалихъ акIахъес кьасли, азиртадли жугьутIуни палестинала ванзурбачи гечбиуб, Палестинала ванза бутIнила ООН-на резолюция кьабулбариб, цаибил гIярабунала ва жугьутIунала дергъ кабикиб ва илис гIергъити таманхIедирути къалмакъар. Тарихлизи мурхь-хIедиркехIе, ил лебтанилра балуси саби.

ЦацабехIтас ил ванзурби багьанданси дяви саби, цархIилтас биалли азаддеш багьанданси. Амма илди кIелра анцIбукьлизир бубкIули ва къиян-жапализи биркули саби даршути адамти, хьунул адамти ва биштIати. Азиртадли адамтани чула хъулри дархьдалтес чевкъули саби.

Палестинализир ишбархIи детурхути анцIбукьунани, гьаларра тарихлизир детаурти гьандиркахъули сари. Гьанбикая цаибил крестовый поход ва крестоносцыбани 1099 ибил дуслизиб Иерусалим буцни, сабира машгьурси СалахIуддинни ил акьубатайчи, илдала арилиуб 1187 ибил дусличи бикайчи калунси.

Лерилра илди дусмазиб Иерусалим бусурманти-алав ва бусурмантала пачалихъуни-алав бирусири. Амма иличибли ил акьубатес хIебиубтири, сенкIун бусурманти-ургаб цадеш агархIели. ИлхIели цаибси яргализиб СалахIуддинни бусурманти динничи, гIилмуличи чарбирес, илдазир гIяхIти къиликъуни руркъес вехIихьиб.

 ИшбархIи гьар шайчибад бусурмантани алавбуцибси Палестинали цIакьани даргес бирули ахIен сунела бухIнаб цабиэс багьандан. Ил дахъал дусмазиб декIар-декIарти кьукьначи бутIибси саби. Илди лебилра ца ватIа бегIти, цадехI мезли гъайбикIути гIярабуни, бусурманти биалра, илди ца стол- алав кабиили цабиэс бирули ахIен.

Пикридухъенаягу хIуша, селра агарси Израиль илди мер-мусаличиб дакIубиубси ахъси даражала техникаличилси, цIакьси гIярмияличилси, ва цацадехI баянти хIясибли ядерный ярагъла бегIсили бетаур. Израиль-алавти имцIаливан бусурмантала жамигIятличилти пачалихъунала гIилмулизир ва техникализир сегъуна сархибдешуни диуба? Сегъуна даражаличиба илдала гIилму? Селичила хьулбикIули илдала жагьилти ва илини илди пачалихъунала гIямрулизиб секьяйда мер бургули? Ишди суалтас жавабтазир сари палестиналантала ва балли регионна бусурмантала ишбархIила аги-кьяйда.

Ил багьандан хIи кертIни тIашаэс гIягIнили саби, даршудешличи умутличил, цадиубли ва цаси тIамаличил бурес чябхъинти кьабулхIедирниличила.

ИшбархIи нушаб асухIебирар гьир-кусбикIутачи лехIяхъес! Мазала гуличебти буцIи кьяйдали, вайнукьабани бусурмантачи уркIи изутала ва уркIецIидулхъутала гIердарили, нуша низамагардешлизи душес дигули саби, лебилра цаличи ца къаршили дявилизи кадизахъес. Илгъуна агиличирти улкни камли ахIен.

Митингуначи дурадухъес, чеббицIес, "жигьадличи" дукьес или жибикIути адамти гьар шайчиб леб. Амма илди жибикIутани жиличи бирхаурли бебкIес асубирути адамтала кьисматуни ва жавабкардеш пикридирули ахIен.

ЧевяхIсини мяхIкамдараба нуша фитнабазирад ва лебилра Палестинализиб гIязабтазибти алжанала унхърачил разибараб. ТиладидикIеная ЧевяхIси Аллагьлизи ﷻ дявти къалабали тамандиахъес ва бусурманти чула ванзурбачиб паргъатли хIербиахъес. ЧевяхIсини лебилра хIушаб гIяхIдеш ва паргъатдеш кьадардараб!

ХIясан МяхIмудов