«Чедииркниличи вирхес дигулра»
ММА-ла шайчибси халкьаниургабси кьукьяла спортла мастер, дунъяла кIина чемпион Хайдакьла районна ЖирабачIи шилизивадси Жамалудин ГIялиев Сербиялизир детерхурти абзаначив урегнайс чедиикиб. ВатIайзи чарухъунхIели, мерла органна пресс-службализи сунела спортла гьунила хIекьлизиб камси ихтилатбариб.
«11 дус виубхIели, Мажалисла дурхIнала-гIулухъабала спортла школализив М.Мирзаевла ва ГI.АмирхIямзаевла бекIдешлиув бокслизи ахъибсири. Школа таманбарили гIергъи, Сургутлизи арякьунра. Илар М.Дибировла, А.ГIисабековла ва Ш.Кьасумовла бекIдешлиур спортла гъудурти журабазир (ММА) тренировкаби даимдарира», - викIи ил. Спортла пикрумачила бурули, абзлизив удихIейкни мягIничебси биъниличилара аргъахъиб чемпионни. Илала хIекьлизив гъайикIалли, гьачамлис ил цайналра удиикили ахIен.
«Гъамти дусмазив UFC-лизив вакIес ва дунъяла хIурмат-кьиматла организациябала цализиб Россияра Дагъистанра гьаладихьес пикрибарилра. Дила бекIлибиубсигъуна мурад саби дунъяла бегIлара гIяхIти мушлукьябачил абзикIни, UFC-ла чемпионна у сархни ва ири ВатIайзи сабухни», - викIи Жамалудин. Илкьяйдали сунела хъалибаргли гIевурцниличилара буриб. «УркIила гьав ахъси даражаличиб калахъес ва мурадличи ваахъес багьандан, спортла гьуни декIарбарибси бархIиличибадал дила хъалибаргли наб мекелли халаси кумекбирули саби. Дила тухумтас, тренертас, шантас ва ну гIевурцути лебтасалра баркалла багьахъес дигулра», - викIи спортсмен. Илини бурни хIясибли, гIямрулизир адамдеш ва хIурматкьимат детхIехъахъни, бегIтани дурхIначи пахрубирни, Аллагь разиварни, илкьяйдали жамигIятлис пайдаласили виъни дебали мягIничебси саби.
Сентябрьла 25-личиб Сербиялизиб бетурхуси абзличи хIядурикIниличилара буриб Ж.ГIялиевли. «Ири багьанданси дила цаибси абз саби ил. Ну 66 килограммла битIакIличилси Бразилиялизивадси мушлукьячил вирхIусира. Ил халати жавабкардешла абз биъни иргъулра. Ил багьандан, лерилра цIакьани дяхIчиаили абзличи хIядурикIулра. Ил абзличибра чедибдеш сархниличи вирхес дигулра», - ихтилат ахирличи бикахъиб Ж.ГIялиевли. Хайдакьла районна бекI ГIялим Темирбулатовли Ж.ГIялиев сархибдешличил мубараквариб ва хайдакьланти иличи пахрули бицIниличила багьахъур. «Халкьани-ургарти абзаначир нушала дурхIнас бутIакьяндеш дарес имканбикIни ва илаб чедибиркни дебали дигесли саби.
Абзличив чедиикниличил бархбасахъи, Жамалудин уркIи-уркIилавад мубаракирулра! Челябкьуси абзличирра гьарбизуни дулгулра ва мурадличи ваили дигулра» - викIи ГI.Темирбулатов.
