Баракатла мажлис
Сергокъалализиб дурхъати бузрас хасбарибси халаси мажлис бетерхур. ЖумягIла мижитлизиб Юждагла декIар-декIарти мераначибад бусурманти цалабикиб. Балбуц бехIбихьиб Шазалила хатIмуличибад, гIур Дурхъаси Кьуръа аятуни делчIун.
Сергокъалала районнна имамтала Советла председатель Рамазан Кебедов гъайулхъули буриб: «ХIушани чебиуливан ишбархIи иш район берхIила шалали шалабарили саби, нушала уркIбазибад дурабиркуси разидешли ва ванадешли ил шала баракатличил нушачи чарбирули. Иш баракатла мажлисличи бакIибти гIялимтас, имамтас ва ЧевяхIси Аллагьла ﷻ разидеш сархес багьандан иша цалабикибти лебилралис баркалла балахъулра. ЧевяхIсини ишгъуна далдуцуни гIуррара гьатIира имцIадараб».
Мажлисличир ЧевяхIси Аллагьличи ﷻ ва Илала Расулличи ﷺ дигиличила мавлидуни ва нашидуни зайдухъун. Диннашал пайдалати хабурти дуриб.
Избербаш шагьарла гIялимтала Советла председатель, исламла гIилмуртала доктор ГIяхIмад МяхIяммадовли ишбархIила манзил нушала республикализиб дебали тIинтIбиубси изала – рибала заралличила ва иличил бархбасунси бунагьличила буриб. ЧевяхIси Аллагьли ﷻ илдигъунти адамтас дяви балахъниличила тIинтIли баянбариб.
Балбуцличир адамтас багаладиэсти гIуррара дахъал вягIза-насихIятуни дуриб. Илди-ургар ДР-ла муфтий шайх ГIяхIмад Афандила кумекчи ГIябдуллахIяжи Хидирбековли бурибси къантIли гьалабирхьулра. «Нуша ишбархIи иша цаладикибти гьарилтала дурхIни ва дурхIнала дурхIни лебти саби. Чинаба илди? Иша сен хIекибти? Нушани гьаман викторинабира дархли дурадуркIули дирехIе илди мижитунази башахъес жибарес багьандан. Нушани биштIати динничи бурсибирес чебси саби: мадрасализи бурхьес, динна гIилму ва Къуръан руркъяхъес. Нушани ишбархIи илдачи имцIали уркIецIидулхъниличибли, илди нушачибад гьарахъбиркули саби, сенахIенну гIягIниси тяхIярла бяркъ кахIесибхIели, биштIахIейчибад бекIла мехIе думкьахъути секIал пайдаладирули саби. ЧIянкIли бархьси динничи бяркънили ва Аллагьлизибад ﷻ урехилицун ил балагь тIашаэс вирар. Иличил бархбасахъи аят гьанбуршис: «Марлира, ЧевяхIси Аллагьли ﷻ акIахъубтазибад урухкIутили бирути чIянкIли дин балутицун ва Аллагь ﷻ валутицун саби».
Адамтала узидешла ва гьалмагъдешла бархбасуначила бурули динна гIялим МухIяммад АрслангIялиев викIар: «Дебали дигесли саби даим динна мажлисуначи башути бахъал адамти ишабра чебаэс, арадеш бараб хIушаб гIуррара илкьяйда дашахъес. Аллагьла Расулли ﷺ бурибсири: «Мурталра жамагIятличил дарх диирая. ЖамагIят цалабиркуси мерличир диреная, дехIибайчир ва цархIилтира динна далдуцуначир. Аллагьли ﷻ нушаб имканти габ нушала дин бузахъес, Аллагьла ﷻ гьунчир диахъес. Аллагьла ﷻ диннизир каленая ва сеналра декIармадиркудая».
Илкьяйдали мажлисличиб гъайбухъун: ДР -ла Муфтиятла арагIерти ихтиюртачилси вакил МухIяммадрамазан Ражабов, Сергокъалала имам МухIяммад ХIусейнов ва бахъал цархIилтира динна гIялимти.
Ил мажлисли цалабяхъиб Сергъокъалалацун ахIенну, Ахъушала Лавашала дубурла районталара, Дербентла районна ва лебил Дагъиста югла бусурмантира. Илдигъунти мажлисуначибли буресагарли халаси пай кабирхьули саби динани-ургарти ва халкьани-ургарти бархбасуни чIумадирнилизи.
