ПялцIикI

ПялцIикI

ПялцIикI бегI гьалаб урбешлизибад бирусири, гIергъити дусмазиб биалли, адамтани гьар журала пялцIикIуни дирули сари. Илала пайдаличила лебтасалра балули биалра, нушанира кам-гьамти насихIятуни гьаладирхьулра.

Хивазибад ва кьумазибад барибси пIялцIикIли цахIнабли кьаркьайчи гIяхIлашал асарбируси саби. Селичибалра гIяхIли кьаркьай чейсуси саби хIедерцIибти кьумазибад барибси, чакар ва гIявадеш гъудурхIеибси пIялцIикI. Илкьяйдали пайдаласи саби жура-журала хивазибадси гъудурмай ахIи, ца журализибад барибси биалли. Беркес гьалаб илизи нерх ва варъа бизидешлис дархаэс вируси сай.

Кунжутлазибадси пялцIикI

Илизиб кальцийла кьадар бегIлара ахъси саби, хIятта ниълизибра нусилизибрайчибра балли. Иличибли цулби, никуби, лига-кьякья чIумати дирути сари. Кунжутлизи кабурхуси фитинни кьаркьайзирти минералти далдуршу, тиаминни биалли нервабала ибкьдеш убису. Илизир имцIали сари А, С, Е, РР ва В кьукьяла витаминти. Илкьяйдали микро ва макроэлементуни: железо, фосфор, кальций, калий, магний, кремний, бор, ванадий, кобальт, литий, марганец, медь, молибден, селен, цинк. Кунжутлизир кьаркьайс дуги-хIерила духIнар гIягIнити медьла 75, кальцийла 35 ва магнийла 30 процент лерти сари. Илгъуна пастали кьаркьайзирти агъулати секIал дурайу ва иммунитет ахъбурцу. Кьаркьайзир кадиркути дарсдешуначи гIяхIси асар биру. Ил имцIаливан хьунул адамтас маслигIятбируси саби железо гIягIниси даражаличиб калахъес, ва жагадешла витамин Е лебхIели, жагадеш гIеркъадиахъес багьандан. Илала дурабадра кунжутла пIялцIикIли спортсментала цIакьани чардиру, холестерин гIяшбиру, чимхъа-умхитIла бузери ункъбиру, камла ва гъезла даража гIяхIбиру, руди умудиру, кьаркьа битIакI камбиру. Амма хъуммартидая, пIялцIикI сецадра пайдаласи биалра, кьаркьа чехIейсудеш лебтас ва кьаркьа битIакI имцIатас ил мяхIкамдешличил пайдалабирес чебиркур.