Бухъмуй ва илала пайда
Ил сабигъуна цархIил агарси продукт саби, сегъуна-дигара хурег бизибарес вируси. Нушачиб бурули бирар жяв замунтазиб акIубси виштIасилис ил супIбарахъес бедлугули бирусири или.
Машрикьла халкьли ил овощибачил, анкIила, диъла хуреглизиб пайдалабиру, ва гIямру гIеркъадирусилизи халбиру. Кавказла хурегуназибра, гьайгьайрагу, бухъмуй гьаман пайдалабиру, хаслира хинкIачил. Ил кигьала гIявадешли нушала кьаркьала витаминтачил, микроэлементуначил чебирцIахъу, иммунитет ахъбиру. Илизир медь, натрий, магний, кальций ва цархIилтира минералти лер. Ил гIявадеш сабли хьалли, жявли ашбирар ва хIила туми атеросклерозлизирад мяхIкамдиру. Илизирти пайдалати секIай нервабала ибкьдеш, бамсри убисес кумекбиру ва кьаркьала ряхIятбиру. Гьар бархIи камси кьадарлизиб бухъмуйла гIявадеш пайдалабиралли, бекIла мехIелизир хIи ласдикIниличи гIяхIси асар биру, хъумхIертниличира, пикри бугабирниличира бархли. Хаслира ил гIяхIси саби нервабала цахIнабикла ва психикала шайчирти излумала бегIтас.
Мурул адамтасра хьунул адамтасра ил дебали пайдаласи саби дурхIя алкIниличи гIяхIлашал асар бирни багьандан. Илизирти Омега – 9, омега – 6, омега – 3 ва цархIилти кьаркьа биркIантас пайдалати гIявадешуни халаси кьадарлизир лерниличибли. Илдани хIила тумира чIумадиру. ХIулбас пайдаласи саби А витаминничил, белокунала ва гIявадешунала цугдеш калахъи, бета-каротинни ашбирахъни багьандан. Бухъмуйлизибси йодли щитовидкалис пайда лебху, фторли – цулбас ва лига-кьякьялис.
Илкьяйдали илини хургьразирти агъулати секIал ва шинкIадеш дураэс кумекбируси саби. Бухъмуйлизир лерти сари кьаркьа температура гIяшбирахъути ва грипп сагъдирути антиоксидантуни. Изиаурти ва мурхьти дяхъурби сагъдиран секIал сунезиб лебни сабаблира ил дарман бируси саби.
Ил давлачебси саби В кьукьяла витаминтачил, чулира нервабала ибкьдеш урисути, камличи гIяхIси асар бируси Е – витаминничил, хIи имцIадируси железоличил, цIакьвируси фторличил, уркIилис хIяжатси калийличил, щитовидная железалис гIягIниси йодличил ва цархIилтира.
Дагъистанлантани гьаман бухъмуй кесекунар барили, берцIили итан жершиличил гъудурбарили хинкIачил букули бирар. Илис кьалия бикIар. Илкьяйдали ил зелабарили, янилис буръахъусира саби.
ХIушаб ишгъуна рецепт гьалабирхьулра.
ЗярхIси бухъмуй кIел бутIаличи бутIили, 15 минут белхьахъес батурли, убкасая. Илизир гьар шайчирад бугаси дисли зума-зумали тIярхъуби дарили, илдазиа итан жершила кесекуни кадихьая. Илис гIергъи гIяхIил зелабарая, бухъмуйли сунес даарила кьадар сарину зе кайсути. ГIур хIунтIена яра цIудара исиутли бакили, 4-5 сягIятлис холодильниклизи кабихьая. Бухъмуй хIядурли саби.
Хурег бизибиаб!
