Курегала кьумазибад пIялцIикI
Курегала кьумазибад пIялцIикI
Курегала кьуми адамла кьаркьайс дебали пайдалатази халдирути сари. Илдазибад барибси пIялцIикIли кьаркьала жигарчебли бузахъу ва иммунитет ахъбарили арадеш имцIабирахъу. Илини хургьрала, уркIила тумала, жихIла ва жинсла биркIантала хасти цахIнабикуни гьунчидуршути сари. Ил гьаман пайдалабиралли, кьаркьала излумазибад мяхIкамбарес имканбикIур. Илизиб клетчатка лебниличибли кьаркьайзир кадиркути дарсдешуни ункъли детурхахъу ва чимхъа-умхитI гIяхIил бузахъу.
ПIялцIикIлизирти кьуми дибгIяндарни багьандан ил паста кьаркьай гIяхIил чекайсуси саби.
Ил пIялцIикIлизир кьаркьайзирти агъула секIал дурайути антиоксидантуни лерти сари, чулира демдрила изайчи къаршидеш дирути. Илкьяйдали пIялцIикIла пайдаличила багьес вирар илизи кадурхути – А, Е, С, В, РР витаминти, йод, цинк, железо, кальций, калий, натрий, магний, фосфор – минералти, олеиновая, линолевая, пальмитиновая – гIявати кислотаби хIясибли. Хасси пикриличи лайикьли саби витамин В 17 (амигдалин), сабира ракла клеткабази баили, илди агардирес кумекбируси.
ПIялцIикIли хъехI, ларингит, бронхит, нефрит агардаресра кумекбиру. Илини бекIла мехIеличи, секIал хъумхIертниличи, хIила даражаличи гIяхIлашал асарбиру. Илала кумекличибли кьаркьа клеткаби жявли духънахIедиур, кам лугIянсили ва жагасили кавлахъу.
Гьаман хьарбиули бирар, селичил букуси пIялцIикI или. Ил саби лебси кьяйдали букес вирар яра кIемаличил ва варъаличил бархаили кашличил, салатличил букесра вирар, илкьяйдали кьацIличил ва чяйличилра. БархIилис пIялцIикIла 2-3 чяйла кьулса даибти сари. Илини адам вахъхIи гушхIейрахъу. ПIялцIикI камси кьадарлизиб биштIатасра пайдаласи саби.
Гьайгьайрагу, илгъуна пIялцIикI сецадра пайдаласи биалра, кьаркьа чехIейсудеш, чакарла изала лебтани ва цIерхьбиэс хIейгутани мяхIкамдешличил пайдалабирес гIягIниси саби.
