Чудни дирути кьар (мокрица)
Чудни дирути кьар (мокрица)
Дагъистанлантани ил гьаман хуреглизиб пайдалабирули бирар. Ил кьарлизирад бизити ва кьаркьайс дебали пайдалати чуду-хинкIи, чудни, салатуни, нергъ ва цархIилтира хурегуни дарес вируси сай.
Илизир С, Е, К втаминти, эфирла гIявадеш, каротин, липидуни, алколоидуни, кислотаби ва дахъал цархIилтира макро ва микроэлементуни лерти сари. Илдачирли илини хIила туми дягIудиру, кьаркьайзирти агъулати секIал дубкIахъу, дяхъурби жявли сагъдирахъу ва иммунитет ахъбурцу. Илизирти сапонинти склерозличи, жижкIаличи ва цархIилти излумачи къаршили дузути сари. ЗярхIти кьар шинкIадеш дурадикайчи гъяждарили, изуси мерличи кадихьалли, кьачIали кIапIдарили изала хIярхIбирар. Илкьяйдали барес вируси сай лига-кьякья изухIелира.
Илала дурабадра дяхънушабани ил дахъал излумачи къаршиси дарман кьяйдали пайдалабиру. Ил кьарли хIулбала шала ункъбирахъу, демдри хIярхIдирахъу ва изала ряхIятбирахъу, букIмала ва дягIла изала сагъбирахъу. Илизирад дарибти чяйли жихI гьалакбирахъу ва урцецуни умудиру. Халкьла медицинализиб ил тIинтIли пайдалабируси саби чедир гьандушибти излумала дурабадра чимхъа-умхитIла излуми сагъдарес, хIи тIашаэс ва хъехIла асурти урисули, ахтури дураэс кумекбируси кьяйдали.
Илкьяйдали илини хIила гъяж гIяшбирахъу, уркIила ва тумала излуми лертас кункдеш алкIахъу. ЗярхIти кьарла 20-30 мл. шин дакIахъили, укес 30 минут лералли дужути сари. Нервабала ибкьдеш убасес багьандан кьарла 1 халаси кьулса бицIили руржути шин чертIая ва 4 сягIят датурли гIергъи, бархIилис хIяйна кьацIли дукес гьалар дуженая. Кьаркьа чехIейсудеш биалли (аллергия), илди кьар далхIедикесра асубирар, ил багьандан мяхIкамдешличил пайдаладиреная.
