Юсуф Идбаг
- Ишавад архIякьядра наб дигул хIебарили,
Ну рикIуси хIейкIадли къиян-жапа дахъдирис.
Ил замана Зулайха унза гIекIес дуцIрухъун,
Илис дигул хIебарес, Юсуф хъярхъли гьавухъун,
ГIеларадли хъямрики, буциб хIева, гъярбердиб,
Илизивад верцили, Юсуф хIилхIи дуравхъун.
Зулайхара аррякьи, ГIязизлизи гIярзрухъун:
- Набчи хIу раши или Юсуфли хIералтулра,
Иличи гьимрукIили, ну хIечи ракIибсира.
ГIязизли Юсуфлизи гьарил секIал хьардаиб.
Юсуфлира илизи - дила ца бикьри лев, - иб,
- Къянаагар бикьридеш диру ил хьарваадли.
Михъирличивси виштIал гъайухъахъун Аллагьли ﷻ:
- Гьалабад гъярбердили биалли рахли хIева,
Иличи хIу вирхаи, рархьли сари Зулайха.
ГIелабад гъярбердили биалли, нагагьладан,
Къунба ругьули сарну, вати Юсуф паргъатли.
ХIева халбарибхIели, варгиб Юсуф умули,
Такьсирла регI Зулайха риъни багьур ГIязизли.
ГIязизли Юсуфлизи цIакьли тиладибариб,
Биубси-бетаурси калахъес дигIянали.
Юсуфли хIебуралра, лебилра халкьли багьур,
Лагъличи дигайла регI Зулайха хабаррариб.
Илди гIяйибтачила Зулайхани багьурмад,
Лебил мисрила хьунри сунечи чукурбяхъиб,
ГIинцбира гьала кайхьиб, дисби някъбази дедиб:
- Дукеная гIинцбани, дисбани гъяриули.
ЦархIил хъуливад Юсуф берхIиван гьаввакIахъиб,
ХIясратдешла цIакьдешли хьунра тIулби кьисдариб.
Ахъризурли Зулайха хьунрази гъайкарухъун:
- Иш наб игни багьандан гIяйибтани дирули,
Гьачам чеваибхIели, гIинцбази кьисхIейкIули,
ТIулби сен кьисдарада – хIили чяхIдикIахъули?
Мисрила шагьарлизи ил хабар тIинтIкабиуб.
Дебали цIахбизурли, ГIязизли пикрибариб,
Юсуф туснакъварили, Зулайха гIязабреркIес,
Юсуф чехIейахъули, кIутIкьудеш чIямбарахъес…
(Хьарахъуд бирар)
