Пагьмуртала урунж

Казимбек Рабазанов акIубси сай Сергокъалала районна УбяхI МулебкIила шилизив. Школа таманаили гIергъи, илини Дагъистанна политехнический институт белчIун. Гидротехникла санигIят хIясибли Къарабудагъкентла ва Сергокъалала районтазив узули калун. Назмурти жявхIейчирад лукIес вехIихьиб. Поэзия дигантас илала сагаси жузлизирад назмурти гьаладирхьулра.

Дигулра

Дигулра дудешуни
Харили хIянбирули,
УркIи иргъути дурхIни
Чули абикьурхIели.

Дигулра наб нешани
Шадли бухънабиули,
Чучибад акIубтачи
Пахрумани биркьули.

Дигулра биштIа дурхIни
Даим хIязтабиркьули,
Илдала баркьудлуми
Халатас гIяхIдилзули.

Дигулра наб зак-зубри
Заб-маркали ургьули,
Ванза дегъхIебиахъес
Аллагьлизи дулгули.

Дигулра хIярамтази
ХIялалдеш чIямдарахъес,
Яра дай уркIилизи
ХIялалдешла нур даршес.

Дигулра инсап-хIяя
Агарти камбиубли,
Адаб-хIяяла бегIта
Лебил дунъя бирцIули.

Дигулра дунъяличир
Дявти диъхIедиубли,
Илди дарес дигути
ХIунтIен цIали игули.

Дигулра неш-дудешла
Агри балхIебалули,
ЦIуръадеш лерси хъали
БекIлил бирхIебирули.

Дигулра адамтазир
Адамдеш цIакьдикIули,
Илди сархес дигути
Даим имцIабикIули.
Дигулра гьарил анкъи
Баракатли бургули,
Чудни-хинкIа бицIибси
Кьумур камхIебирули.

Дигулра гIяхIгъубзнала
Авид гьарзабикIули,
Вайгъабза вархли калтес
Мер акьухIебулхъули.

Дигулра анкIи мухъи
ВерхIкьярякьли духъули.
Хъябхъяла къирилиу
Гьачамалра хIеркули.

Дигулра ханжал-тупанг
БяхIличи чекайхъули,
БиштIа дурхIна хIязлизир
ПайдалахIедирули.

Дигулра хъулир хьунул
Мурили гъайрикIули,
Къапу гIела бигьунси
Хяван гъямхIерикIули.

Дигулра нугъай унци
Хъуми делгIес дубгули,
Хъумачир сархул ризкьи
Шинкьантазир лукьули.

Дигулра наб унруби
Узбиван хIербирули,
Цаличи ца башуси
Дякьлар кьар хIедирули.

Дигулра давлачевли
Сунна къиян букули,
Мискинна чебизурси
Шангла ухIнахIелхъули.

Дигулра хъубешуна
Рурсбас гIякьлу бурули,
Гуявти руркъес чули
Къайгъни дакIухIейрули.

Дигулра жанай вавни
Гьар замана дирули,
ГIяхIгъабзала хIябличир
Янира камхIейрули.

Дигулра бухънабала
Гумай бацIхIебулхъули,
Жагьилти бухънабаэс
КъалабахIебикIули.
Дигулра азир маза
Сагначир гIяйдикIули,
Ца дус ласбухъунхIели,
Азир имцIадикIули.

Дигулра дубуртазир
ЧакIни хамли урцули,
Лусентазир делшунти
Пукьни камхIедирули.

Дигулра мурул-хьуна
Хъали-цIа ихъхIейхъули,
МаслигIятлис бурибси
Къяна цугбиркахъули.

Дигулра гьар бусурмай
Кьиблала мер балули,
Сужда бируси мерла
УргIевли кахIелзули.

Дигулра мугIяллимли
ДурхIнас багьни лугули,
Илди чебхIебулкIуси
Бархьси гьуни бургули.