Август базла анцIбукьуни гьандиркахъули…
Август базла анцIбукьуни гьандиркахъули…
Августла 19-личиб Узидешла Юртлизиб Дагъистаннизи духIнадухъунти халкьани-ургарти къачагъунала кьукьни тIутIукьякьядарибхIейчирад 22 дус дикнилис багъишлабарибси балбуц бетерхур. Ил дураберкIиб миллатла политикала ва динна бархбасунала шайчибси Министерствола сипталичил. Илар бутIакьяндеш дариб политикала, жамигIятла ва динна хIяракатчибани, жагьилтала организациябани, гIилмула цахIнабикунани, итхIелла анцIбукьунала бутIакьянчибани.
ДураберкIнила мурад – миллатуни-ургабси ва динани-ургабси уржибдеш ва даршудеш калахъни, гражданин ва патриот бяркъ Дагъистанна жамигIят-ургаб гьалабяхI арбукни. «Нушала республикала руководстволи хасси пикри бяхIчииуси саби жагьилтас патриот бяркъ бедлугниличи. ИшбархIила балбуцра илис хасбарибси саби. Нушани итхIелла анцIбукьуни гьандуршес ва илдачила бурес чебси саби. СенахIенну нуша-ургаб илабти бутIакьянчибира бикьрумира леб, итхIели лебил республикалис ва арагIебли Россиялисра урехи ахIекIахъес ва даршудеш мяхIкамбарес багьандан къайгъи дакIубарибти, илди хъумартес гьеч асухIебирар. Хаслира гьаннала манзил тарих сагаси тяхIярли чеббелкIес дигутира айхъухIели. Дагъистанлантани лебтазилра чебаахъиб душмантас ишаб мер агни ва илдас мутIигIхIебирни.
Дагъистанна халкьла миллатуни-ургарти ва динани-ургарти зиддешуни гьачамалра диубти ахIен ва диэс дирути ахIен, республикализиб даршудеш калахъес багьандан, лебилра цабиубтири. Ил секIал лебтанилра аргъибсири итхIели. Итди анцIбукьуназир бутIакьяндеш дарибти, игитдеш чедаахъибти ва алхунти нушани гьеч хъумхIертехIе», - викIи миллатла политикала ва динани-ургарти бархбасунала шайчивси министр Энрик Муслимов. Илис гIергъи гъайбухъунти итхIелла БотIлихла районна бекI МяхIяммад Узархановичли, Муфтиятла председатель Шамил ГIялихановли, интербригадала командир Шамил Аслановли, дявила къуллукъличи хIядурбирнила отделениела начальник Явнус Жанбалаевли, хьунул адамтала Союзла председатель Интизар Мамутаевани дергъла бутIакьянчиби гьанбушили, илдала гъабзадешличила буриб.
Бахъалгъунти бургъанти хIисаблизи кахIесили калниличила август базла анцIбукьунала бутIакьянчибани ва бикьрумани пашмандешличил багьахъур, ва республикала руководстволи илдачи пикри бяхIчиаахъес тиладибариб. Итди дусмазиб Дагъистанна Президент МяхIяммадгIяли МяхIяммадовли, мэр СягIид Амировли, МяхIяммад ГIямаровли ва Адильгерей МяхIяммадтIагьировли жамигIят цабиахъубли, къачагъуни дугIаэс халаси пай кабихьниличилара буриб. ИтхIели Россияла Президент В.Путинни Дагъистаннизи архIя дураберкIибсири ва халкьла игитдешлис ахъси кьимат кабатурсири. Халкьани-ургарти къачагъунала кьукьначи къаршили бургъути ополченцыби дявила бутIакьянчибачил цугбурцниличила федеральный хIукму дураибсири. Дагъистанничила хасси пикри лебнилис ил цагьатIи бикьрили бетаур.
НАИДА ГЪУРУЕВА
