Иличирли декIардулхъулра
Нушала тах шагьар МяхIячкъалализирти гIямру дахъ дебали дуцIли ардашули сари. Адамти даим къалабали саби хIянчиличи ва белчIудиличи балкьаэс. Буралли, адамтала гIямрула халаси бутIа гьундурачиб арбашан биубли саби. СенахIенну шагьар халабикIухIели ва илала ца мерличивад цархIил мерличи ваэс багьандан 2-3 сягIят харждарес чевкъули саби, хаслира хIянчила мерлабад гьарахъли хIербирутас.
Савли хIянчиличи аркьухIели биаб, бархIехъ чарулхъухIели биаб, цацахIели дай хIерила заманара машинабани гьундури гарчли дирцIули сари. Ил нушала шагьарлизиб гьанна гIядатли бетаурли саби, «час пик» сабли «пробкализи» викира бикIутира нушала гIямрула бутIали биубли саби. Нуни иш белкIлизиб гьачам-гьатIи сабурличила ва хIурматличила гьанбушес дигулра. Гьаман гьундурачивхIели чебаэс вирар секьяйда маршруткабас гьуни чеббяхъили къалабабикIути жагьилти шоферти бирарал. Илдани гьундурачиб чусра жамигIят бикути транспортлисра урехи алкIахъули саби, гьундурачир уюнти дирули, низам-кьяйда хIедузахъули ва халаталара хIурмат хIебирули. Сунела гьуни буцили башуси машинала гьунира чеббяхъес бажардибиркули саби гьалабикес багьандан, чус гьуни гьаргбиайчи сабурбарес хIебирули.
Халкьлизиб «жумягI бархIи шагьарлизи дураулхъес гIяхIси саби» бикIуси буралара леб нушала манзил. СенкIун жумягI бархIи камхIебирар матъал, Аллагь ﷻ багьандан адамти бикути маршруткабала шоферти. Илкьяйдали гьундурачибра машинабала бегIтани гьундурачибти адамти бетицIахъес машина тIашаили хIурматбирули бирар, адамтасцун ахIенну машинабасра. ЖумягI бархIила вягIза-насихIятли асарбарили биэсра асубирар…
Тамаша саби, цацабехIтани мижитлизибад дурабухъунхIели илар дурибти хъумуртни. ИлабкIун имамтани вягIза-насихIят дирути сари гьундурачив секьяйда виэс гIягIнисил, мяхIкамдеш бирахъес даим махбикIули, низам-кьяйда дузахъес иргъахънила хIянчи дурабуркIули. Ил тяхIярли иргъахъуси саби жамигIятла транспорт, къалабаси медицинала кумекла машина, цIа дилшахъуси машина ва илдигъунти цархIилтира ардашахъес мер бирес гIягIнили биъниличила. ГьалакхIебикIули сабурличил бирахъес, хIурматбирахъес даим жибикIути саби. Амма жагьилтани илди дурути чейсули ахIен яра чузи дурибти жявли хъумуртули саби. Сабурбарес ва хIурматбарес хIебалнили гьундурачирра ва цархIилти мераначирра дахъал бехIемцIуни детарниличила гьалабра чуйнара бурибсири. Сабур – Алжанала нигIмат саби или буруси хIядисра кес вирар ишаб. ХIурматра сабурра нуша бусурман адамтала гIямрулизир чараагарли хIяжатти къиликъуни сари. Иличирли декIардулхъутира нуша цархIилтазирад. Адам чинав виаллира сунела бегIлара гIяхIти къиликъуни дакIударес чебси саби, хаслира сай бусурман сайра викIусини…
