Дарсдешуни
Мях1ячкъала шагьарлизирти кьакьурбала даража ункъбарес биалри, илди къирли кадуцес биалри или, бахъал адамти пикрибик1ули бургар или гьанбиркур наб. Сенк1ун цацадех1ти кьакьурби лерг1ер дукьдуунти сари. Гьундурачиб «ямочный ремонт» бирулра или дурадурк1ути х1янчира илцадра дек1ар чедетаахъили дирули х1едирар, итар-ишар нукьсандешуни чедиули сари, х1ябал пукьа къирли дуцалли ца уббалтули дирути. Бурни х1ясибли илис сабаб - х1янчизарти камли биъни ва къир дурхъали биъни.
Х1ера, Мях1ячкъалализиб сагаси къирла ва бетонна завод бузесиуси саби ибси бакьибх1ели дебали г1ях1бизур, гъамси челябкьлализиб биалра нушала гьундурала даража ункъбиэсгу ибси пикри бак1иб. ООО «Строительная компания М - групп» – ла инвестициябас къирла ва бетонна завод т1ашбатурли хъарарахъули саби. Ил проектлис тах шагьарли Шамхал поселоклизиб 3 гектарла кьадар ванзала ч1ябар дек1арбарибсири. Бусяг1ятла замана ахъти технологиябала г1яг1ниахъала даршили, монтаж барили х1ядурдарили, бек1лидиубти делши тамандарили сари. Заводли бузери бех1бихьили, тестирование дурабурк1ули къир ва бетон дурайули саби.
Дек1ардарибти инвестициябала 125 миллионнизирад 112 харждарили сари, илди 89, 6 процентла кьадар сари. Ил проект г1ямрулизиб бетурхахъули 87 бузерила мер ак1ахъубли сари, план х1ясибли 100 сарх1ели. Предприятие тамай бузес бех1бирхьуси саби ишдуслизиб.
ООО «Строительная компания М - групп» Мях1ячкъалализиб 2023 ибил дусличибад бетон дурайули бузуси саби. Илкьяйдали илини адамти х1ербирути юртани ва царх1илтира объектуни т1ашдалтути сари. 2024 ибил дуслизиб компанияли 9 миллион 400 азир къуруш арцла сархибтири ва умуси хайри 125 азир къуруш арцла.
Нушала республикализир илдигъунти заводуни алк1ахъни дебали г1ях1си баркьуди саби, хаслира адамти х1янчиличил г1еббурцни. Илдала кумекличил шагьарла гьундурира къирли дурцниличи рирхес дигулра.
