Багьадур мушлукья

Багьадур мушлукья

Спорт адамла гIямрулизиб белхъхIебелхъуси бутIали бетарули саби. Бахъал леб нушала республикализиб спортлизи ахъибти уршбирурсби. Илди-ургаб лебил дунъяличиб машгьурбиубтира леб.

Илкьяйдали чекабизурли бузути ва спортла шайчирти ахъанайтачи абацIес къайгъилизибтира камли ахIен. Илдигъунтазивад ца сай Кьурбанов МяхIяммад Кьурбанович. Ил акIубси сай МяхIячкъала шагьарлизив 2000-ибил дуслизив. Илала жинс ХIурхъила шилизибадти саби. МяхIячкъалала 50 ибил школализив учIули калунси сай МяхIяммад.

Школа таманбарили гIергъи, илини 2015 ибил дуслизиб юртани лушнила, гIилмула ва техникала колледжлизибси белчIуди хъараахъур. Гьанна бусягIят ил ДГУНХ-ла юриспруденцияла факультетла кIиибил курсла студент сай. МяхIяммадлис спорт дебали дигахъу ва халаси замана илис декIарбирули сай. Илини гьанна касибси шабагъатличи нушани пикри бяхIчихIеэс хIедиубра. Ил багьандан ну иличил гьунираира ва ишгъуна ихтилат дураберкIира.

— МяхIяммад, муртхIейчивад хIу спортлизи ахъилри?

— Ну 8 дус виубхIели вехIихьибсири мушулвашес.

— Спортла дахъал жураби лер, хIуни биалли, тхэквондо сен чеббикIибсири, сегъуна - биалра баян лебу хIела иличил бархбасунси? Чили кибсири хIу ила?

— Школализив учIули левай, нуни ил спортла жураличи пикри бяхIчиаибсири. Тхэквондо асарчебли гьалабяхI башни наб дебали гIяхIбизур, ва илар дила цIакьани ахтардидарес иштяхIдухъун.

— Иш базлизиб дураберкIибси «WORLD HAPKIDO CUP 2021» бикIуси дунъяла чемпионатличиб хIуни кубок сархилри, цаэсилгъуна иличил хIу мубаракирулри.

— Баркалла халаси.

—КIиэсилгъунара, сегъуна декIардеш лебри хIед илди абзаназиб. Селичибли декIарбулхъули хапкидо тэхквондолизибад? —Тхэквондо кьяшмачил пяхъвикIнила жура саби, хапкидолизир биалли, цархIилти журала (някъбани вирхъес, хъяб бурцес, ахъуцили лайвикIес…) вяшатIалара дарес вируси сай.

— Нуни балуливан, тренировкабачиб кьяш бячи хIу базалра хъулив калири. Илкьяйда жявли сагъвиэс ва абзаначи хIядурвиэс секьяйда имканбакIиба?

— Гъира ва хIяракат биалли, се-дигара сархес вируси сай, – иб МяхIяммадли пишвяхъили.

— Хъалибаргла хIуни чеббикIибси гIямрула гьуниличила сегъуна пикри саби?

— Илдани ну гIевурцулра, хаслира дила дудешли. ГIуррара гьалавяхI вашес пикри саби дила. Илкьяйда нушала ихтилат ахирличи бикиб. МяхIяммадли набзи сунела медальти, кубокуни ва грамотаби чедаахъиб. Илдала биалли, ахир аги. Нушала республикализир, Кавказлизир ва халкьани-ургар дурадуркIути жура-журала абзаначир илини бутIакьяндеш дирули сай. 2019 ибил дуслизиб СКФОлизиб дураберкIибси тхэквондола абзлизиб илини цаибил мер сархибсири. Северный Кавказла Федеральный округла 3-йна, ДР-ла 5-йна, Россияла арцла ва жармала чемпион ветаурси сай ил. Дахъал лер илала сархибдешуни, лерилра илди ишар дуресра хIейрар. Челябкьлализирра гIурра сархибдешуницун диаб хIед, МяхIяммад. Спортла ахъанайтачиб бегIлара ахъси ганзухъличи ацIахъес арадеш ва цIакьани габ хIед ЧевяхIсини.

ПАТIИМАТ ШАХОВА