Шәүүәл айы

Рамаҙан айынан һуң Шәүүәл айы башлана. Рамаҙанда иһә һәр хаҡ мосолман күберәк изегелектәр эшләп ҡалырға ашыҡһа, тырышһа, Шәүүәл айы ла беҙгә ошо яҡшылыҡтарыбыҙҙы тағы ла арттырырға, байытырға мөмкинлек бирә. Бәлки, тотҡан ураҙаларҙа хата-кәмселектәр булғандыр, йә ҡайһы бер көндәре тороп ҡалғандыр, Шәүүәлдә шуларҙы төҙәтергә була. Шуға ла был айҙың тәүге алты көнөндә ураҙа тотоу бик сауаплы ғәмәл. Рамаҙанда сәскән изгелектәрҙе Шәүүәлдә тәрбиәләп үҫтереүгә тиң ул.

Һәр кем мәктәптә уҡыған. Дәрестә алған белемде онотмаҫ өсөн, уҡыусыға гел ҡабатлап, нығытып торорға кәрәк. Шәүүәл айы ла шулай: Рамаҙанда алған белемдәрҙе үҫтерергә, изге ғәмәлдәрҙе дауам итергә, бәрәкәт-ниғмәтте һаҡларға кәрәклеген белдерә. Әгәр ҙә инде, Рамаҙан бөттө тип, изге ғәмәлдәрҙе лә туҡтатһаҡ, ниндәй үҫеш, алға китеү була инде?

Шәүүәл беҙгә «Рамаҙанда эшлә-гән изгелектәр ысын йөрәктән булдымы икән?» тигән һорау ҙа биргән кеүек. Әгәр ҙә мосолман, ураҙалар тотоп, йәнен, тәнен таҙартып, бер тамсылай ғына булһа ла, яҡшы яҡҡа үҙгәрә алһа, быны, һис шикһеҙ, башҡа айҙарҙа ла, йылдарҙа ла дауам итәсәк. Әҙәм балаһы фәрештә түгел, хаталар ҙа, кәмселектәр ҙә була шул. Хаҡ мосолмандың маҡсаты ла бит, үҙеңдең кәмселектәреңде күреп, аңлап, уны төҙәтеү, гонаһтарҙан ҡотолоу. Ә быны беҙ көн һайын, ай һайын, йыл һайын эшләргә тейеш.

Әгәр ҙә быйыл Шәүүәл айына аяҡ баҫҡанбыҙ икән, Аллаһҡа биргән ғүмер, ризыҡ өсөн ҙур рәхмәтле булайыҡ. Тик Раббыбыҙҙың рәхмәтенә ирешер өсөн беҙгә бирелгән ай, йыл, тип ҡабул итәйек ошо мәлде, ваҡытты. Һәм киләһе йыл Шәүүәл айҙарын беҙгә тағы ла яҡшырып, таҙарынып, сафланып ҡаршыларға, үткәрергә насип итһен Аллаһ!