Фазиләтле Рәжәп айы
Фазиләтле Рәжәп айы
Мөбәрәк айҙың исеме ғәрәп телендәге «әр-руджүб» һүҙенән алынған һәм «ҙурлау, данлау» тигәнде аңлата. Был тап ошо ваҡытта Аллаһтың ﷻ Пәйғәмбәребеҙ Мөхәммәдте ﷺ Әл-Исра һәм Әл-Миғраж кеүек хикмәтле ваҡиғалар менән ололауы-на бәйле. Рәжәб шулай уҡ һуғышты тыйған дүрт айҙың (мәшһүр әл-хурумдың) береһе.
Изге Ҡөрьәндең бер аятында шулай тиелә (мәғәнәһе): «Ысынлап та, Аллаһтың ай һаны Күктәр менән Ерҙе яратҡан көнөндәге китабында – ун ике ай. Шуларҙың дүртеһе: Мөхәррәм, Рәжәп, Зөлҡағиҙә һәм Зөлхизә – хәрәм айҙар. Был – хаҡ дин. Шул айҙарҙа үҙ-үҙегеҙгә золом ҡылмағыҙ!» (“Әт-Тәүбә” сүрәһе, 36-сы аят).
Башҡа хәрәм айҙарҙағы кеүек үк, Рәжәп айында ла ураҙа тотоу сөннәт һәм матур ғибәҙәттәрҙән һанала. Имам әл-Хатиб әш-Ширбини үҙенең «Мүғни әл-Мохтаж» китабында былай тип яҙа: «Имам Мөслим риүәйәт иткән: «Рамаҙан айынан һуң ураҙа тотоу өсөн иң яҡшыһы – Мөхәррәм айы», – тигән хәҙискә ярашлы, Рамаҙандан тыш ураҙа тотоу өсөн иң ҡулайлыһы – хәрәм айҙар, шулар араһынан иң маҡтаулыһы – Мөхәррәм (һижрәт йылъяҙмаһында тәүге ай), шунан инде Рәжәп, унан һуң Зөлҡағиҙә һәм Зөлхизә».
Рәжәп – изге Рамаҙан айының яҡынайыуына ишара. Рәжәптең тәүге көнөндә күк көмбәҙендә яңы айҙы күреү менән һөйөклө Пәйғәмбәребеҙ ﷺ тулҡынланып: «Йә Аллаһ ﷻ ! Рәжәп һәм Шәғбән айҙарында фәтихаңды бир һәм Рамаҙан айына барып етергә насип ит», – тиер булған (әт-Табәрани).
Аллаһу Сөбхәнәһү үә Тәғәлә барыбыҙға ла Рәжәп айында ураҙа тотоп, ғибәҙәт ҡылыуҙа күп көс, ихласлыҡ һалып, мохтаждарға хәйер-саҙаҡа биреп, бәрәкәтле осорҙо файҙалы һәм сауаплы үткәрергә насип итһен, ярҙамын бирһен, йөрәктәребеҙҙе паҡландырһын. Илаһи әмин!
