орбан ғәйете мөбәрәк булһын!

Дағстан Республикаһы мөфтөйө, шәйех Әхмәт хажи Абдулаев Ҡорбан байрамы айҡанлы барлыҡ мосолмандарға үҙенең ҡотлау һүҙҙәрен еткерҙе.

Әс-сәләмү ғәләйкүм үә рахмәтуллаһи үә бәракәтүһү!

Һеҙгә Аллаһу Тәғәләнең шәфҡәте һәм именлеге булһын, ҡәҙерле ҡәрҙәштәр!

Мосолмандарҙың яҡынлашып килгән иң төп байрамдарының береһе – Ҡорбан ғәйете менән һеҙҙе ихлас күңелдән тәбрикләйем!

Был мәртәбәле байрам шулай уҡ изге ерҙәргә сәфәр сыҡҡан мосафирҙар өсөн оло хаждың тамамланыуын билдәләй.

Хаж юлдары асылған өсөн Аллаһу Тәғәләгә сикһеҙ рәхмәттәр әйтәбеҙ, ә бит бер нисә йыл дауамында, пандемия шарттарында, беҙ ошо оло бәрәкәттән мәхрүм ҡала килдек. Раббыбыҙ беҙҙе киләсәктә ундай афәттәрҙән Үҙе һаҡлаһын, Үҙе ҡурсалаһын!

Аллаһтың рәхимлеге менән быйыл бик күп мосолмандар хаж ҡылыу мөмкинлегенә иреште. Ғаләмдәр хужаһы хаж ҡылыусылар үтәгән барлыҡ йола-ғибәҙәттәрҙе, уларҙың һәм беҙҙең салған ҡорбандарыбыҙҙы һәм изге эштәребеҙҙе ҡабул итһен. Әмин.

Әлбиттә, ошо көндәрҙә илебеҙҙә һәм бөтә донъяла һаулыҡтары сикләнгән инсандарға, етем, яңғыҙаҡ, ярлы һәм мохтаж кешеләргә ярҙам йөҙөнән ойошторолған масштаблы хәйриә акцияларының күпләп үтеүе ҡыуандырмай ҡалмай. Аллаһу Тәғәлә ошо изге эшкә үҙ өлөшөн индергәндәргә – өлкәндәр булһынмы ул, балалармы – барыһына ла меңдәрсә сауаптарын яуҙырһын һәм киләсәктә беҙгә хәйриә эштәрендә тағы ла әүҙемерәк ҡатнашырға мөмкинлек тыуҙырһын.

Хаҡ Тәғәлә беҙҙең ихлас доғаларыбыҙҙы ҡабул итһен, ниәттәребеҙҙе сафландырһын һәм дөрөҫләһен! Баш особоҙҙа – тыныс күк йөҙө, һәммәбеҙгә – сәләмәтлек, бәхет, бәрәкәт ирештерһен!

Ҡорбан ғәйете мөбәрәк булһын!