Фәһемле хәл

Фәһемле хәл

Һәр кеше үҙенең көсөн (энергияһын) көсәнмәй генә икенсе кешегә бирә ала. Нисек тиһегеҙме?

Бер ваҡыт супермаркетта, әйберҙәр алып, түләр өсөн сиратҡа баҫҡанымда, эшләп торған берҙән-бер кассаға ниҙер булды: аппарат эштән сыҡты. Боҙоҡ касса арҡаһында сиратта халыҡ күбәйҙе. Араларында кассир ҡыҙыҡайға ризаһыҙлығын, асыуын белдереүселәр ҙә байтаҡ ине. «Техниканы ҡасан йүнәтерҙәр икән?», «Хәҙер ваҡытыбыҙҙы әрәм итеп, ошонда һерәйеп торайыҡмы, бер сәғәт көтөргә кәрәк булһа, нишләрбеҙ?» − тип, төрлө яҡтан һорауҙар яуҙы. Сиратта берәү генә тыныс булды, өндәшмәйсә, сабыр ғына тора бирҙе.

Был күңелһеҙ хәлдән борсола, йонсой башлаған кассир һәр береһенә көттөрөүҙең сәбәбен ипле генә аңлатырға тырышты, сабыр итергә әйҙәне. Бер мәлгә лә тынмаған һорауҙарға яуап биреүҙән, хеҙмәтләндереү шарттары менән ҡәнәғәт булмағандарҙың тәнҡитенән тамам хәле бөттө, ахырыһы, ҡыҙҙың арҡаһы күҙ алдында бөгөлгәндәнбөгөлдө. Ниһайәт, аппарат эшләп китте. Берҙән-бер тыныс ҡалған баяғы ирҙең сираты еткәс, күрәһең, был ҡыҙҙың күңелен күтәрергә, уға көс өҫтәргә теләгәндер, һүҙҙәре ихлас яңғыраны: «Һеҙҙең сыҙамлыҡҡа һәм ныҡышмаллыҡҡа һоҡланам.

Ысынлап та, бик ҡыйын хәл килеп тыуҙы. Мин һеҙҙең нисек тырышҡанығыҙҙы, түҙемле, әҙәпле булыуығыҙҙы күрҙем. Килеп тыуған хәлдә һеҙҙең бер тамсы ла ғәйебегеҙ юҡ. Шундай ҙур һәм мөһим эш башҡарыуығыҙға рәхмәт Һеҙгә! « − тип әйтеп һалмаһынмы! Шундай ихлас һүҙҙәрҙе тыңлағас, мине лә аңлаған кешеләр бар икән, типтер инде, кассир еңел һулап ҡуйҙы. «Рәхмәт, әлеге мәлдә тап шундай һүҙҙәр кәрәк ине миңә”, − тип йылмайҙы ҡыҙ. Сиратым еткәс, кассир мине хеҙмәтләндерҙе. Әйберҙәремде пакетҡа тултырып, алға бара биргәс, йәнә кассирға әйләнеп ҡараным. Йәш ҡыҙҙың хәрәкәттәре ҡыйыу, арҡаһы төҙәйгәйне инде. Был аҫыл, мөрәүәтле ир уға үҙенең энергияһын (көсөн) биреп сығып киткән. Еңел генә кәрәкле һүҙҙәр табып, уны күҙ алдыбыҙҙа терелтеп ебәрҙе!

Касса артында ултырған һылыуға ғына түгел, әле генә сыр-сыу килешкән кешеләргә лә матур үрнәк күрһәтте ул һәм барыбыҙға ла үҙенең һәйбәт энергияһын ҡалдырып китте. Ә һеҙ, һеҙ бер-ике яғымлы һүҙ менән кешенең күңелен күтәреп ебәрә алаһығыҙмы? Әлбиттә, был барыбыҙҙың да ҡулынан килә. Барығыҙға ла яҡшы энергия өләшеп һәм алып йәшәргә яҙһын, ҡәҙерле уҡыусылар!

РЕНАТ ДУБКИНСКИЙ

Светлана Әбсәләмова тәржемәһе