Файҙалы эликсир

Бары тик өс компоненттан торған был эсемлек бик күп ауырыуҙарға ҡаршы көслө ҡорал. Һарымһаҡ, бал һәм алма һеркәһенән торған ҡушымта – дауалау эликсиры. Ул иммунитетты нығыта һәм ҡанды насар холестериндан таҙарта. Күп ауырыуҙар аша һынау үткән. Ике аҙна өҙлөкһөҙ ҡулланғандан һуң, төрлө ауырыуҙарға дусар булғандарҙың хәле яҡшырыуы күҙәтелә. Шулай уҡ төрлө ауырыуҙарҙы иҫкәртеүҙә, профилактикалауҙа, инфекцияларға ҡаршы файҙалы.

Эликсир өсөн йөҙ грамм алма һеркәһе, йөҙ грамм бал, ун тырнаҡ һарымһаҡ кәрәк. Ингредиенттарҙы бергә ҡушып, ныҡлап ябып, һыуытҡыста тотоғоҙ. Ашар алдынан ике аш ҡалағы эсергә кәңәш ителә. Сәй йәки һыу эсеп ҡуйырға мөмкин, ун биш минут ашамай торорға кәрәк. Биш көн эскәндән һуң организмда дөйөм тонустың үҙгәреүен, аш һеңдереүҙең яҡшырыуын һиҙерһегеҙ. Хәлһеҙлек, баш ауыртыуы кәмер, йоҡо тәрәнерәк булыр. Анемия менән интегеүселәрҙең хәле енеләйер. Организмдың яман сирҙәргә, төрлө инфекцияларға ҡаршы торорлоҡ көсө артыр. Ҡулланыр алдынан табиб менән кәңәшләшергә онотмағыҙ.

(Ислам календарынан)