Лавр япрағының файҙаһы
Ике мең йылдан ашыу инде халыҡ медицинаһында лавр япрағы ҡулланылыуы билдәле. Хәҙерге рәсми медицина ла лавр япрағы менән дауаланыуҙың һөҙөмтәле икәнен раҫлай.
Стоматит, гангивит менән яфаланғанда, аңҡау елһенгәндә, ауыҙҙан насар еҫ килгән осраҡтарҙа, көнөнә бер нисә тапҡыр лавр япрағын сәйнәргә һәм бер сәғәт ашамай, эсмәй торорға кәрәк.
Лавр япрағы валерьяндан (бесәй үләне) ҡалышмай, тынысландырыу һәләтенә эйә. Йоҡлай алмаған баланың мендәренә бер нисә япраҡ һалырға мөмкин. Лавр япраҡтарын ун биш минут эҫе һыуҙа тотоп, ауырыу ятҡан бүлмәгә ҡуйырға була. Япрактарҙың хуш еҫе бүлмәне дезинфекциялай, бактерияларға ҡаршы көрәшә.
Ҙур булмаған ун япраҡты өс стакан ҡайнап торған һыуҙа өс сәғәт тотоп, көнөнә өс тапҡыр яртышар стакан эсергә кәрәк. Ҡандағы шәкәр кимәле кәмер, артритҡа һәм туберкулезға ҡаршы ярҙам итер.
Лавр япраҡтарынан эшләнгән майҙы тире ауырыуҙарынан, оҙаҡ ятып тән боҙолоуҙан (пролежни) ҡулланырға була. Ҡалаҡ ярым (аш ҡалағы) ваҡланған япраҡтарҙы бер стакан таҙартылған үҫемлек майына һалып, бер аҙна ҡараңғы, һалҡын урында төнәтергә кәрәк (һыуытҡыста түгел).
Аяҡтар ныҡ тирләгәндә һәм насар еҫ килгәндә, утыҙ япраҡты ҡайнар һыуҙа өс сәғәт тотоп, аяҡтарҙы ун минут тирәһе ошо төнәтмәле һыуға тығып ултырырға кәрәк. Лавр япрағын ҡулланыуҙың кире тәьҫире бик күҙәтелмәй. Шулай ҙа аллергия булған осраҡта, бигерәк тә ауырлы ҡатындарға, бала имеҙгән саҡта, иғтибарлыраҡ булырға кәңәш ителә.
