Мумиё – универсаль продукт
Был шифалы продукт тураһында Давуд Антаки былай тип яҙа: «Мумиё грек теленән тәржемә иткәндә «тәнде һаҡлаусы» тигәнде аңлата, уның шифалы көсө ҡырҡ йыл дауамында һаҡлана».
Мумиёны түбәндәге ауырыуҙарҙа ҡулланалар: баш ауыртыу, баш өйәнәге (мигрень), фалиж (паралич), бит нервыһы фалижы, астма, тын ҡыҫылыу, туберкулез, ашҡаҙан һәм бауыр көсһөҙлөгө, һары ауырыуы, асцит, талаҡ (селезёнка), бәүел ҡыуығы сирҙәре, һөйәк һәм быуындар һыҙлауы. Уны төрлөсә, бигерәк тә ас ҡарынға һәм майҙа эретелгән килеш ҡулланалар. Мумиё һынған һөйәктәрҙең тиҙерәк тоташыуына булышлыҡ итә, шулай уҡ сыҡҡан быуынды ултыртҡандан һуң да ҡулланырға мөмкин. Тәҡдим ителгән дозаһы 200 миллиграмдан (0,2 г) 3 грамға тиклем.
Мумиё ярҙамында дауалай торған ауырыуҙарҙың киң исемлеге уның уникаль клиник эффекты менән аңлатыла: ул организмдың һаҡлау көстәрен әүҙемләштерә һәм уның регенератив (ҡабат тергеҙеү) процестарын тиҙләтә. Ул организмда минераль матдәләр алмашыныуын әүҙемләштерә, ҡан сос-тавында, һөйәктең ҡоролошонда мөһим роль уйнаған кальций, калий, фосфор тоҙҙары миҡдарын арттыра. Уның йоғонтоһо аҫтында ҡанда эритроциттар һаны арта һәм гемоглобин миҡдары күтәрелә. Мумиё ревматик процестарҙы юҡҡа сығара, тығындарҙы аса, шештәрҙе шиңдерә.
Мумиё нервы эшмәкәрлегенә лә ыңғай йоғонто яһай. Веналар киңәйгәндә. һәм тромбофлебит булғанда ярҙам итә. Мумиёны ҡабул итеү ашҡаҙан юлына һәм ашҡаҙан стеналарына яҡшы йоғонто яһай. Шулай уҡ регенератив процестарҙы әүҙемләштерә, иммун системаһын һәм бөтә организмды нығыта.
Мумиёны һыуҙа, һөттә, балда һ.б. иретеп эсергә мөмкин. Әҙер шыйыҡсаны артабан һыуытҡыста ябыҡ һауытта һаҡларға мөмкин, әммә ҡулланыр алдынан ғына әҙерләнгән шыйыҡса һәйбәтерәк һанала.
Мумиёны сир ваҡытында ҡулланылған дарыу үләндәре, тамырҙар менән бергә ҡулланыу яҡшы һөҙөмтә бирә.
Халыҡ медицинаһында мумиёны бойҙай бөртөгө дәүмәлендә (0,2-0,3 г) бүләләр һәм тәүлегенә 1-2 тапҡыр иртән һәм йоҡлар алдынан эсәләр. Хәл насарайғанда, дозаны ике тапҡырға кәметергә кәрәк. Мумиёны уртаса дозала ҡулланыуға ҡаршы күрһәтмәләр юҡ, тиерлек.
Профессор И. П. Неумывакин китабы буйынса мумиёны ҡулланыу рецептары
Бронхиаль астманан айырыуса татлы тамыр (солодка) төнәтмәһендә иретелгән мумиё ярҙам итә. 500 мл татлы тамыр төнәтмәһендә 0,5 г мумиёны иретергә. Көнөнә 1 тапҡыр, иртән 200 мл төнәтмә эсергә. 8 йәшкә тиклемге балаларға порцияны кәметергә. Эсемлекте һыуытҡыста һаҡларға. Дүрт көндән һуң яңыһын әҙерләргә.
Быуындар ауыртҡанда: 0,5 г мумиёны 100 г шыйыҡ бал менән бутарға һәм төндә быуынға компресс яһарға кәрәк. Иртәнге аштан бер сәғәт алда 0,2 г мумиё ҡабул итергә. Курс 10 көн дауам итә, тәнәфес − 5 көн. Дауалау өсөн 2-3 курс талап ителә.
Өҫкө тын юлдары елһенгәндә. һәм бронхит менән сирләгәндә: 0,2-0,3 г мумиёны киске аштан һуң 3 сәғәт үткәс, йәки ашар алдынан 30-40 минут алда, иреп бөткәнсе, ауыҙҙа тоторға кәрәк, унан һуң 0,5 стакан баллы һөт эсеп, 40-50 минут булһа ла, йоҡлап алырға ҡушыла.
