Ултырыш нервыһының ҡуҙғыуы

Ултырыш нервыһының ҡуҙғыуы

Ултырыш нервыһының (седалищный нерв) ҡуҙғыуы – билдәге, ултырыштағы, аяҡтарҙағы һыҙланыуҙың эҙемтәһе.

Ултырыш нервыһы – тәндәге иң ҙур нервыларҙың береһе. Башҡа нервыларға ҡарағанда ул йышыраҡ ҡуҙғый. Уның тәғәйенләнеше аяҡтарҙың хәрәкәтен һәм һиҙемлеген контролдә тотоу. Был нерв аяҡтың буйынан-буйына һуҙылған, шуға ул ҡуҙғыһа, бөтөн аҫҡы тән өлөштәре ауырта.

Әнәс ибне Мәлик  еткереүенсә, Аллаһ Рәсүле ﷺ: «Ултырыш нервыһының ҡуҙғыуынан дауа һарыҡтың ҡойроҡ майында. Уны иретеп, өс өлөшкә бүлергә һәм иртәнсәк ас ҡарынға бер өлөшөн эсергә крәк», – тип әйткән. Әнәс : «Мин был дауалау ысулын өс йөҙҙән ашыу кешегә тәҡдим иттем һәм уларҙың барыһы ла һауыҡты» – тигән. (Ибне Мәджәһ)

Икенсе хәҙистә: «Кем һарыҡтың ҡойроҡ майын һатып ала йәки уға уны бүләк итәләр икән, ул уны өс өлөшкә бүлеп, өс көн эсендә ас ҡарынға ашаһа, ултырыш нервыһын дауалар. Ул майҙы иретеп, эсергә була йәки иретмәйенсә, ашарға мөмкин», – тип әйтелгән. (әт-Табәрани)

Һарыҡ майын ҡулланыу рецептары

Урта ҙурлыҡтағы һарыҡтың (хәҙистә «ҙур ҙа түгел, бәләкәй ҙә түгел» тиелгән) һәм бигерәк тә яланда көтөлгән һарыҡтың ҡойроҡ майын алырға. Уны иретеп, өс өлөшкә бүлеп, өс көн эсендә ас килеш эсергә һәм ауыртҡан урынға шул майҙы һөртөргә. Ирегән майҙы бал менән ҡушып һөртһәң, тағы ла яҡшыраҡ буласаҡ.

Шулай уҡ талғын утта тоҙҙо йылытып, ауыртҡан урынға өс сәғәткә һалырға тәҡдим итәләр. Шулай өс тапҡыр эшләү шифаһын бирәсәк.

Ултырыш нервыһын икенсе ысулдар менән дауалау рецептары

Мастика, тоҙ, куркуманан эшләнгән ҡатнашма ярҙам итергә тейеш. Барыһын да ваҡлап, талғын утта зәйтүн майында ҡайнатырға. Килеп сыҡҡан ҡатнашманы ҡуҙғыған урынға һөртөргә кәрәк. Шулай уҡ уны быуындар һыҙлағанда, арҡа ауыртҡанда ҡулланырға мөмкин.

Гармала орлоғо ла нервыларҙы яҡшы дауалай. Унан тыш гармала орлоҡтары ҡанды таҙарта, эпилепсиянан, мигрень һәм башҡа нервы ауырыуҙарынан ярҙам итә.

Иртәнсәк ашар алдынан 5-7 гр (1 бал ҡалағы) 12 көн эсендә ашарға кәрәк. Шулай уҡ бер-ике киҫәк һарымһаҡты 12 көн буйы аш алдынан ашарға тәҡдим ителә.

Кер һабыны менән ҡынаны 1/1 пропорцияһында ҡушып ултырыш нервыһы ҡуҙғығанда, тубыҡ ауыртҡанда һөртөргә була.

Шулай уҡ ауыртҡан ергә медицина белгестәренән һөлөк һалдырырға йәки хиджама эшләтергә була. Мәккә сеннаһын эсеп, тәнде таҙартырға мөмкин.

Мөхәммәт Дибиров.

Ләйсән Бәхтиева тәржемә итте