Виноград – иң туҡлыҡлы емеш
Әбү Нүғәйм тапшырған хәҙистә: «Пәйғәмбәребеҙ ﷺ виноград һәм ҡарбуз яратҡан», – тиелә.
Тәбиғи торошо ҡайнар һәм еүеш, татлы һәм һутлы виноградтың иң яҡшыһы тип ағы, унан килә ҡыҙылы һәм ҡараһы иҫәпләнә. Ул организмды нығыта һәм туҡландыра. Бер нисә көн алдан өҙөлгән виноград яңы өҙөлгәненән һәйбәтерәк.
Дауыт Әнтаки әйтеүенсә: «Виноград – емеш-еләктең иң татлыһы һәм иң тәмлеһе. Шул уҡ ваҡытта, иң туҡлыҡлы емеш булараҡ, кәүҙә ауырлығына килтереүе мөмкин. Ҡанды таҙарта, бөйөрҙәрҙең хәлен яҡшырта. Виноградтан һуң һыу эсергә ярамай, асцит (эскә һыу йыйылыу) булыуы мөмкин. Ризыҡланғандан һуң да шунда уҡ виноград ашау тыйыла».
Виноградтың составында кеше организмы өсөн кәрәк булған минераль тоҙҙар, микроэлементтар бар һәм ул А, В1, В2, В5, В6, С, К, Р витаминдарына бай.
Ҡара виноград ҡаҡырыҡ сығыуҙы еңеләйтә, шуға күрә плеврит, бронхит, туберкулез менән ауырығанда тәҡдим ителә. Элек-электән ҡара виноградты тын юлдары, йөрәк-ҡан тамырҙары сирҙәрен даулағанда ҡулланғандар.
Виноград менән дауланғанда, йөрәк тибеше яйлана, ҡан баҫымы нормаға килә, шешенеү кәмей, ҡан таҙара, йоҡо яҡшыра.
Анемия, оҙайлы бөйөр сирҙәре, артрит, быуындар һыҙлағанда, аш һеңдереү юлдары эшмәкәрлеге, матдәләр алышы боҙолғанда, виноградтың файҙаһы ифрат ҙур.
Емеш-еләк һуттары араһында виноград һуты иң яҡшыларҙан һанала. Ул организмды тонуста тота, һаулыҡты нығыта. Хәл бөткәндә, нервы системаһы ҡаҡшағанда, йөрәк мускулдары йомшағанда тәҡдим ителә. Виноград һуты бактерияларға ҡаршы тороу, һейҙек ҡыуыу, тирләтеү, эсте йомшартыу һәләтенә эйә. Ҡандағы холестеринды кәметә, юғары ҡан баҫымын түбәнәйтә.
Ашағанға тиклем бер сәғәт алда, көнөнә өс тапҡыр виноград һуты эсеү файҙалы.
