Пәйғәмбәр һәм балалар
Аллаһ илcеһе Мөхәммәд ﷺ балаларҙы бик яратҡан. Улар менән йыш ҡына аралашҡан, хәлдәрен белешкән, кәйефтәрен күтәрер өсөн төрлө уйындар уйнай торған булған. Пәйғәмбәребеҙ ﷺ кескәйҙәргә үҙе башлап сәләм биргән, хатта сүкәйеп, һәр береһенең күҙенә тура ҡарап аралаша торған булған.
Балалар ҙа Пәйғәмбәрҙе ﷺ бик яратҡан.Уны күреү менән, үҙ итеп етәкләп алғандар. Аллаһ Рәсүле бер ваҡытта үҙе башлап балаларҙың ҡулын етәктән ысҡындырмаған: танһыҡтары ҡанғансы кескәйҙәр шулай етәкләшеп йөрөй торған булғандар. Мөхәммәд салләл-лааһу ғәләйһи үә сәлләмдең үҙенең ете балаһы булған: Ҡасим, Абдулла, Ибраһим, Зәйнәб, Руҡыя, Фатима һәм Өммөгөлсөм.Үкенескә күрә, Фатиманан башҡалары Пәйғәмбәр ﷺ иҫән саҡта уҡ мәрхүм булғандар. Аллаһ Илсеһе ﷺ үҙ балаларын да ныҡ ҡәҙерләгән: ҡосағына алып, үбеп иркәләгән. Быны күреп торған бер бәҙүән:
– Мин аптырайым һиңә, беҙ балаларыбыҙҙы улайтып уҡ яратмайбыҙ, – тигән.
– Тимәк, Аллаһу Тәғәлә һеҙҙең йөрәгегеҙҙе миһырбанлыҡтан мәхрүм иткән, – тигән Пәйғәмбәр ﷺ.
Аллаһ илсеһе ейәндәре Хәсән менән Хөсәйенде лә ныҡ ҡәҙерләгән. Уларҙы күкрәгенә ҡыҫып ҡосаҡлап, Аллаһу Тәғәләнән уларға тәүфиҡ, бәхет һораған.
“Балалар – беҙҙең төп байлығыбыҙ, уларға дөрөҫ тәрбиә һәм төплө белем бирегеҙ!” – тигән.
