Мөхәммәд пәйғәмбәр ﷺ
Ҡорайыш ырыуы илселәренең Әбүталипҡа килеүе
Аллаһ Рәсүле ﷺ һынға табыныусыларҙың аҙашыуы нимәнән ғибәрәт икәнлеген халыҡҡа аңлатыуын дауам итә. Ә был ваҡытта ҡорайыштар Әбүталипҡа үҙҙәренең илселәрен ебәрә. Тегеләр уға: «Эй Әбүталип! Һин беҙҙең арала иң оло һәм иң хөрмәтле кеше. Һинең ҡустыңдың улы беҙҙең аллаһтарыбыҙҙы кәмһетә, динебеҙҙе хурлай, ә ата-бабаларыбыҙҙы, аҙашыусылар, тип атай. Һин йә уны үҙең туҡтат, йә булмаһа, быны эшләргә беҙгә рөхсәт бир. Әйҙә бергәләп туҡтатайыҡ».
Әбүталип илселәргә ипле генә яуап ҡайтара, килеп тыуған ыҙғышты йомшартырға тырыша. Һәм тегеләр, бүтән бер һүҙ ҙә әйтмәй, ҡайтып китәләр. Мөхәммәдте ﷺ көйәләндермәҫ өсөн, Әбүталип уға ҡорайыштарҙың килеүен әйтмәй. Һәм Аллаһтың Һөйөклөһө ﷺ, уға юғарынан нисек ҡушылған, шулай, кешеләрҙе хәҡиҡәткә саҡырыуын дауам итә.
Ләкин Ҡорайыш аҡһаҡалдары икенсегә Әбүталипҡа килә. «Эй Әбүталип, беҙ һинән ҡустыңдың улын тыйыуыңды һораныҡ, әммә һин быны эшләмәнең. Бынан һуң беҙ, беҙҙең аллаларыбыҙҙы мыҫҡыллауға һәм ата-бабаларыбыҙҙы кәмһетеүгә түҙеп тора алмайбыҙ. Йә һин уны ауыҙлыҡла, йәки беҙ һуғыш асабыҙ һәм, бер-беребеҙҙе үлтереп бөтмәйенсә, туҡтамаясаҡбыҙ», − тиҙәр.
Был һүҙҙәр Әбүталипты ныҡ борсоуға һала һәм ул Мөхәмәдте ﷺ саҡырып алып әйтә: «Эй улым, миңә беҙҙең туғандарыбыҙ һинең өҫтән ялыу менән килде. Туғандар араһында ыҙғыш ҡуптарыу яҡшы түгел. Улар һинең уларҙың динен мыҫҡыл итмәүеңде һәм уларҙың аллаларына теймәүеңде талап итә. Һин мине лә, үҙеңде лә йәллә. Минең көсөм етмәҫлекте минең өҫтөмә йөкмәтмә», − ти.
Аллаһ илсеһе ﷺ Әбүталипҡа: «Эй олатай! (атаһының ағаһы – ред.) Аллаһ менән ант итәм, әгәр минең уң ҡулыма ҡояшты, һул ҡулыма айҙы һалып: «Аллаһ ҡушҡан вазифаңдан баш тарт», − тип әйтһәләр ҙә, мин, үлгәнгә тик-лем йәки Ер йөҙөндә Аллаһтың дине таралмай тороп, вазифамды үтәүҙән туҡтамаясаҡмын», − ти. Шулай ти ҙә, атаһының ағаһы унан баш тарта, тип уйлап, урынынан тороп, сығырға йүнәлә. Уның күҙҙәре йәш менән тула. Быны күреп, Әбүталип ҡорайыштарҙың талабын һөйләгәненә үкенә һәм, Мөхәммәдте ﷺ ҡосаҡлап: «Эй улым, һин Аллаһ ҡушҡанды үтәүеңде дауам ит. Мин иҫән сағымда һине һәр саҡ яҡлаясаҡмын», − ти.
