Йәсрибтә Пәйғәмбәребеҙҙең ﷺ тәүге вәкиле
Хаж мәле тамамланғас, барыһы ла үҙ ҡәбиләләренә тарала. Шул иҫәптән, ун ике хажи Йәсрибкә ҡайтып китә. Пәйғәмбәребеҙ ﷺ, Йәсрибтә ислам тураһында һөйләһен, иман килтергәндәрҙе Ҡөрьән уҡырға өйрәтһен өсөн, хажиҙар менән бергә Мусғәб ибне Ғүмәйрҙе ебәрә.
Бер ваҡыт Мусғәб тәүге мосолмандар менән бер баҡсала ултырғанда, уның янына ҡулына һөңгө тотҡан бер ғәрәп килә. Ул Аус ҡәбиләһенең башлығы Үсәйд ибне Худайр булып сыға. «Һин бында нимәгә килдең? Ғүмерең ҡәҙерле булһа, бындағы кешеләрҙең башын ҡатырма, ҡайҙан килдең, шунда кит!» − ти Үсәйд. Мусғәб уға: Минең нимәгә килгәнде белергә теләһәң, бәлки, һин беҙҙең янға ултырырһың һәм минең һүҙҙәремде тыңларһың? Әгәр һөйләгәндәрем күңелеңә хуш килһә, минең менән ризалашырһың, әгәр оҡшамаһа, һине бер кем дә мәжбүр итмәҫ», − ти. Усәйд уның менән килешә һәм, һөңгөһөн ергә ҡаҙап, Мусғәб янына килеп ултыра. Мусғәб уға ислам тураһында һөйләй, Ҡөрьәндән аяттар уҡый. Усәйдкә былар тәьҫир итә. Ул: «Үҙ ғүмеремдә бынан да матурыраҡ һүҙҙәр ишеткәнем булманы. Был динде ҡабул итер өсөн нимә эшләргә кәрәк?» – тип һорай. Мусғәб: «Кеше башта тулы тәһәрәт алырға тейеш, кейемдәрен таҙаларға, шәһәҙәт әйтергә һәм ике рәҡәғәт намаҙ уҡырға тейеш», – ти. Оҙаҡламай Усәйд ислам ҡабул итә һәм: «Тағы бер кеше бар – Сәғәд ибне Мүғәҙ – бөтә ҡәбилә уның артынан эйәрә. Әгәр ул да исламды ҡабул итһә, бында Пәйғәмбәр артынан эйәрмәгән бер кем дә ҡалмаясаҡ», – ти.
Үҙенең исламда икәнен йәшереп, Үсәйд Сәғәд ибне Мүғәҙҙе алып килә. Мүсғәб уға ла ислам тураһында һөйләй, Ҡөрьән аяттары уҡый. Сәғәд ибне Мүғәҙ шунда уҡ, шәһәҙәт әйтеп, ислам ҡабул итә.
Ошонан һуң Сәғәд, ҡәбилә халҡын йыйып, уларға мөрәжәғәт итә: «Эй Бану Әбделәшхәл ҡәбиләһе, һеҙ мине кем тип беләһегеҙ?». Тегеләр: «Һин беҙҙең арала иң айыҡ, иң дөрөҫ фекер йөрөтөүсе, һәм һин – беҙҙең юлбашсы», – тип яуап бирә. Уларҙың яуабынан һуң Сәғәд үҙенең халҡына былай ти: «Мин һеҙҙең берегеҙ менән дә – ир булһынмы, ҡатын кеше булһынмы – һөйләшмәйәсәкмен, әгәр һеҙ Аллаһҡа һәм Уның Рәсүле Мөхәммәдкә ﷺ иман килтермәһәгеҙ». Һәм шул уҡ көндө кискә табан ҡәбилә кешеләре, бер кешенән башҡа, бөтәһе лә ислам ҡабул итә. Йәсрибтә исламдың таралыуы тураһында ҡыуаныслы хәбәр менән Мусғәб ибне Ғүмәйр Мәккәгә әйләнеп ҡайта. Йәсрибтә ул бер йылдан аҙыраҡ йәшәй.
