ШӘЙБӘНЕҢ ҒӘБДЕЛМОТТАЛИПҠА ӘЙЛӘНЕҮЕ
ШӘЙБӘНЕҢ ҒӘБДЕЛМОТТАЛИПҠА ӘЙЛӘНЕҮЕ
Һашим мәрхүм булғас, артабан хажиҙарҙы ҡабул итеү вазифаһы уның ҡустыһы Мотталип ибне Ғәбдеманафҡа күсә. Ул да ҡорайыштар араһында үҙенең йомартлығы менән билдәле була.
Уны барыһы ла хөрмәт итә. Мотталип, Йәсриб ҡалаһында ағаһының улы йәшәгәнен белеп ҡалғас, шунда барып, Шәйбәне Мәккәгә алып ҡайта. Ҡорайыш халҡы был йәш егет Мотталиптың ҡоло тип уйлап, уға Ғәбделмотталип тип ҡушамат бирә. Артабан Мотталип кешеләргә Шәйбәнең үҙенең ҡустыһы икәнлеген аңлатып ҡараһа ла, халыҡ араһында барыбер шул ҡушамат тарала. Мотталип Шәйбәне үҙ улы һымаҡ ҡарап, тәрбиәләй. Аҙаҡ сауҙа эштәре буйынса Мотталип Йәмән ерендә мәрхүм булып ҡала. Уның үлеменән һуң Ғәбделмотталип ҡорайыштар араһында хаҡлы рәүештә вазифаны үҙ өҫтөнә ала.
Уны ла ҡәбилә халҡы ата-бабаларын хөрмәт иткән кеүек хөрмәт итә. Ғәбделмотталипты батырлығы, ғәҙеллеге өсөн, ярлылар һәм көсһөҙҙәр яҡлы булғаны өсөн, һәм шулай уҡ изгелеге һәм йомартлығы арҡаһында ныҡ ихтирам иткәндәр.
Көслө ҡоролоҡ ваҡытында урындағы халыҡ уға Ҡәғбәнең Раббыһынан ямғыр һорау үтенесе менән мөрәжәғәт итә. Ғәбделмотталип ярлылар тураһында ғына түгел, тауҙарҙа йәшәгән хайуандар хаҡында ла хәстәрлек күргән. Шуға ла уны «сүллектәге кешеләрҙе һәм тауҙағы хайуандарҙы ҡараусы» тип атағандар.
