Уҡытыусы, әҙибә, хажиә
Байрамдар яҡынлаған һайын, кемделер ҡотлап, һөйөндөргө килә. Барлыҡ дуҫтар, коллегалар иҫкә төшә. Бала саҡ, мәктәп йылдары, институт, тәүге хеҙмәт юлын бергә барлаған хеҙмәттәштәр...
Был юлы сәләмемде йәш саҡта Баймаҡ районы Йылайыр урта мәктәбендә бергә эшләгән, байрам табындарында бергә йөрөгән коллегам, башҡорт теле һәм әҙәбиәте уҡытыусыһы, хәҙерге көндә хажиә, әҙибә, оҙаҡламай һигеҙенсе тиҫтәһен артыласаҡ Лира Яҡшыбаеваға ебәрәм.
Талантлы уҡытыусы, ҙур ихтирам, халыҡ һөйөүен яулаған әҙибә, халҡыбыҙҙың күренекле ун ике дин әһеленең тормош юлын өйрәнеп, халҡына еткереүсе Лира Миңлеәхмәт ҡыҙы. Ҙур шәхес, тарихта һәм Рәсәй тормошонда яҡты эҙ ҡалдырған, халыҡта әүлиә һәм табип булараҡ та билдәле Зәйнулла Рәсүлев образы хажиә Лира ижадында ҙур урын алды. Яҙыусы һәр бер изге затты өйрәнеүгә ихлас тотондо. Күпме юлдар үтелде, күпме осрашыуҙар, эҙләнеүҙәр, йоҡоһоҙ төндәр... Һайлаған уҡытыусы һөнәренә тоғролоғо, уҡыусылары, ата-әсәләрҙең оло ихтирамы уға көс, сәм бирҙе. Ололар һүҙен иғтибарлап тыңлай белә, тарихи факттарҙы тикшерә, өйрәнә. Күңеле һәр саҡ талпына, эҙләнә.
«Бөтәбеҙгә бер ер шары» китабы ҙур баһаға лайыҡ булды. «Еңеүҙә доға көсө» әҫәре доғаның ни тиклем әһәмиәтле булыуын һәм уны урынлы ҡулланырға кәрәк икәнлеген аңлата. Оло быуындың йәштәргә иғтибарлы булыуы, йәштәрҙең ололар фекеренә ҡолаҡ һалыуы ил өсөн әһәмиәтле икәнлеге, ҙур етәкселәр сығыштарына байҡау яһап, дәлилләп бирелә.
Оло тормош юлы үткән ҡатын, балалар әсәһе, ейәндәр өләсәһе Лира Яҡшыбаева. Балаларының һәр уңышы әсә кеше өсөн оло шатлыҡ һәм мәртәбә. Яҙыусының ҡыҙы Гөлнара Вәхит ҡыҙы Яҡшыбаева Өфө фән һәм технологиялар университеты уҡытыусыһы, иҡтисад фәндәре докторы дәрәжәһенә лайыҡ булды. «Ояһында ни күрһә, осҡанында шул булыр», – тип халҡыбыҙ белмәй әйтмәгән. Уҡытыусы әсәһе, инженер атаһы булған Гөлнара, ата-әсәһенең, эш буйынса оло вазифалар биләп, ҡайҙа ғына эшкә күсерелеп, төрлө ерҙә йәшәһәләр ҙә, һәр ваҡыт ғәзиздәренең халыҡ ҡаршыһында күҙ өҫтөндә ҡаш булыуҙарын күреп үҫә. Ошо халыҡ иғтибары, ихтирамы Гөлнараны ла теүәллеккә, маҡсатлы, ғилемле булырға әйҙәп тора.
Лира Яҡшыбаеваның әҫәрҙәре изгелеккә өндәгән кеүек, беҙ ҙә бер-беребеҙгә ихтирамлы, иғтибарлы булып, изге эштәр эшләргә ашығайыҡ!
