Иғтибар! Конкурс!
Иғтибар! Конкурс!
Халҡыбыҙҙың аҫыл улы Зәйнулла ибне Хәбибулла Рәсүлевтың 190 йыллығы айҡанлы “Әс-Сәләм” гәзите редакцияһы шәйех Зәйнулла Рәсүлевҡа арналған иң яҡшы поэтик әҫәргә конкурс иғлан итә.
Конкурстың маҡсаты:
– бөйөк дин белгесе шәйех Зәйнулла Рәсүлев шәхесенә, хаҡ иман юлына, ватаныбыҙ, динебеҙ тарихына ҡыҙыҡһыныуҙы арттырыу;
– милли телде һаҡлап ҡалыу һәм үҫтереү;
– һөнәри хеҙмәттәшлек өсөн яңы авторҙар табыу.
Конкурста ҡатнашыу шарттары
Конкурста Башҡортостан Республикаһы Яҙыусылар союзы ағзалары, шулай уҡ союз ағзаһы булмаған авторҙар ҡатнаша ала. Йәш буйынса сикләү юҡ.
Конкурс премияһы
Еңеүсегә 10 мең һум күләмендә бер премия бирелә. Конкурсты ойоштороусылар махсус приздар булдырыу, призлы урындар һанын кәметеү йәки арттырыу хоҡуғына эйә.
Конкурсҡа тәҡдим ителгән эштәргә талаптар
Конкурсҡа әүәл бер ерҙә лә баҫылып сыҡмаған, башҡорт телендә яҙылған һәм баҫылған (ҡулъяҙмалар алынмай) әҫәрҙәр тәҡдим ителә. Әҫәрҙең исеме, аныҡ ижад йылы, жанры (шиғыр, поэма, ода, робағый, бәйет, мөнәжәт һ.б) күрһәтелеүе шарт.
Шулай уҡ авторҙың фамилияһы, исеме, атаһының исеме, тыуған көнө, адресы, телефоны, ҡыҫҡаса ижади автобиографияһы, шөғөл төрө күрһәтелгән мәғлүмәттәр булырға тейеш.
Конкурсҡа ебәрелгән материалдар рецензияланмай һәм кире ҡайтарылмай.
Эштәр 2023 йылдың 1 ноябренә тиклем түбәндәге адрес буйынса ҡабул ителә: assalambash876@gmail.com
Конкурсҡа 2023 йылдың декабрь айында йомғаҡ яһала.
