«Әс-Сәләм» – Берләшкән Ғәрәп Әмирлектәрендә
«Әс-Сәләм» – Берләшкән Ғәрәп Әмирлектәрендә
«Әс-Сәләм» гәзитенең мөхәррире, шағирә Зөлфиә Ханнанова Берләшкән Ғәрәп Әмирлектәренең Шарджа ҡалаһында уҙғарылған Халыҡ-ара китап йәрминкәһендә ҡатнашты.
Был абруйлы сара Шаржаның хакимы Шәйех Солтан Ибне Мөхәммәд Әл-Ҡасими етәкселегендә быйыл 43-сөгә үткәрелгән. Күргәҙмәлә 2213 нәшриәт ҡатнашҡан. Шуларҙың 1298 – ғәрәп, 915-е башҡа илдәрҙең нәшриәттәре. Йәмғеһе 210 телдә сыҡҡан китап продукцияһы тәҡдим ителгән.
«Барыһы ла китаптан башлана!» девизы аҫтында үткән йәрминкәгә донъяның төрлө илдәренән арҙаҡлы яҙыусылар саҡырылған. Рәсәйҙән шулай уҡ ҡарасәй яҙыусыһы Сәлимә Коркмазова, табасаран шағирәһе Сувайнат Кюребекова, лезгин шағиры Владик Батманов, бүрәт яҙыусыһы Амарсана Улзытуев, удмурт теленән тәржемәсе Алексей Арзамазов, татар шағирәһе Луиза Янсуар ҙа ҡатнашҡан. «Беҙҙең барыбыҙҙы ла берләштереүсе әйбер – яҙған әҫәрҙәребеҙҙең Рәсәй халыҡтары милли әҙәбиәтен һаҡлау программаһы сиктәрендә Мәскәү ҡалаһында нәшер ителгән төрлө жанрҙағы күләмле антологияларҙа донъя күреүе, – ти Зөлфиә Ханнанова. – Донъя кимәлендәге китап йәрминкәһендә ҡатнашырға саҡырыу алыуыбыҙ ҙа ошо программаға бәйле».
Башҡорт шағирәһе Ғәрәп Әмирлектәренә үҙе яҙған билингва «Таш-ҡатын» китабынан тыш, башҡорт, рус, инглиз телдәрендә нәшер ителгән халҡыбыҙҙың рухи мираҫы «Урал батыр» эпосын, донъя халыҡтары әҙәбиәтен үҫтереүгә тос өлөш индергән «Ватандаш» журналын һәм «Әс-Сәләм» дин-мәғрифәт гәзитен дә алып барған.
