Иғтибарымды туплай алмайым
Эштәремде даими рәүештә кисектерәм. Гел көндәлек ваҡ-төйәк мәшәҡәттәр менән мәшғүлмен. Мөһим эштәрҙе гел һуңғы мәлгә ҡалдырам. Йыш ҡына эштәр йыйылып китә, уларҙы хәл иткән саҡта, ныҡ арыйым. Иғтибарымды төп эшкә йүнәлтә алмайым. Был хәлде нисек төҙәтергә?
А., Наро-Фоминск ҡалаһы
Дин белгесе яуабы
Ысынлап та, ҡайһы бер осраҡтарҙа кеше мөһим эштәрен ваҡытында башҡарып өлгөрмәй. Күбеһенсә, әһәмиәткә эйә булмаған мәшәҡәттәр менән даими рәүештә булыша башлай. Бының төрлө сәбәптәре булыуы ихтимал, ләкин был хәл кешенең үҙ тормошона етди ҡарамауында, уны бар иткән Аллаһу Тәғәлә алдындағы бурыстарын үтәргә онотоуында. Шуға ла Аллаһ уның эштәрен бәрәкәттән мәрхүм итә.
Шуның өсөн дә был тормоштоң ваҡытлы икәнен аңлау мөһим. Кеше үҙенең Раббыһы алдындағы бурыстарын да, тирә-яғындағы кешеләр алдындағы бурыстарын да иғтибарһыҙ ҡалдырмаҫҡа тейеш.
Күп кенә проблемалар ябай ғына дөрөҫ приоритеттарҙы булдырмауҙан тыуа. Ислам хоҡуҡ системаһында ғәмәлдәрҙең күпселеге аныҡ төрҙәргә бүленгән: фарыз, үәжип, сөннәт, мөстәхәб, мүбәх, мәкрүх һәм хәрәм. Был төшөнсәләр ғәмәлдең мотлаҡ, хупланған, нейтраль, шелтәләнгән йә тыйылған булыуын аңлата. Әммә ғәҙәттә тормошта был принциптар онотола һәм был дөрөҫ түгел.
Психолог яуабы
Көндө һөҙөмтәле итеп ойоштороу өсөн иң тәүҙә уны планлаштырырға өйрәнергә кәрәк. Бында көндәлек алып барыу бик файҙалы ысулдарҙың береһе. Унда киләсәктә була торған мөһим эштәрҙе ваҡыт буйынса билдәләргә була.
Әгәр ҙә кеше алдан төҙөлгән план буйынса көнөн үткәрһә, психологик яҡтан ул тәртипкә тиҙерәк һәм еңелерәк күнегәсәк.
Шулай уҡ ваҡыт нимәгә сарыф ителеүен асыҡлау мөһим. Бөгөнгө шарттарҙа ваҡытты иң күп алған әйберҙәрҙең береһе – кеҫә телефоны һәм ундағы социаль селтәрҙәр, уйындар.
Тәжрибә күрһәтеүенсә, кеше үҙенең буш ваҡытының уртаса дүрттән бер өлөшөн файҙаһыҙ әйберҙәргә сарыф итә. Әгәр һеҙгә лә ул ғәҙәт хас икән, социаль селтәрҙәрҙә ултырыуҙы һәм маҡсатһыҙ аралашыуҙы сикләргә кәрәк.
Бер көн интернетҡа инмәҫкә тырышығыҙ. Шул саҡта күпме ваҡыт бушаясаҡ икәнлеген һәм күпме эш башҡарып өлгөрөүегеҙҙе үҙегеҙ күрерһегеҙ. Төрлө ысулдарҙы ҡулланып ҡарағыҙ, аҙаҡ үҙегеҙ өсөн иң уңайлыһын табырһығыҙ.
Һорауҙарға дин белгесе Адиль Ибраһимов һәм психолог Алиасхаб Мурзаев яуап бирҙе.
Ләйсән Бәхтиева әҙерләне.Ы
