Халыҡ хәтерен яңыртып
Баймаҡ районының үҙәк китапханаһында, Сибай музейында, Төйәләҫ, Билал ауылдарында күренекле Учалы яҙыусыһы Әҡлимә Сафина менән бик йылы осрашыу үтте.
Яҙыусы оҙак йылдар «Дуҫлыҡ» совхозы директоры булып эшләгән Ғиззәтуллин Сибәғәт Сөнәғәт улы, уңың ғаиләһе тураһында «Етемлектең әсе күҙ йәштәре» исемле китап яҙып, уның презентацияһың уҙғарҙы. Был сарала Сибәғәт Сөнәғәт улы менән бергә эшләгән коллегалары китап геройы тураһында йылы хәтирәләре менән бүлеште. Шулай уҡ уҡыусылар иғтибарына Әҡлимә Сафинаның «Зәйнулла ишан эҙҙәренән» китабы ла тәҡдим ителде. Күренекле дин әһеле тураһында мәғлүмәт йыйыу өсөн яҙыусы үҙенең рухташтары менәң 38 ауыл-ҡалаларға сәфәр ҡыла. Троицк, Ҡазан, Силәбе ҡалаларында, Дағстанда бик күп мәсеттәрҙә осрашыуҙарҙа ҡатнаша.
Ошондай матур йөкмәткеле сараны үткәреүгә күп көс һалғандары өсөн урындағы үҙидаралыҡ рәйесе Ислам Исрафил улына, мәктәп директоры Зилә Айҙар ҡыҙына, ветеран уҡытыусы Сәғиҙә Муллахмәт ҡыҙына, ауылдың ағинәйҙәр ойошмаһына учалылар бик ҙур рәхмәт һүҙҙәрен еткерҙе, автор ошо китапты яҙышыуға мәғлүмәт биреүселәргә һәм район китапханаларына автографлы китаптарын бүләк итте.
«Сөсө күмәс тәме» исемле хикәйәгеҙҙе күҙ йәштәрһеҙ уҡып булмай», – тип, Билал ауылы ағинәйҙәре Әҡлимә Сафинаға үҙ ҡулдары менән бешереп күмәс алып килгән.
«Ишандар, әүлиәләр тураһында хәтирәләр, риүәйәттәр туплау һәм уларҙың мәңгелек рухын халыҡ хәтерендә ҡабаттан тергеҙеү иң изге һәм сауаплы ғәмәлдәрҙең береһе! Ҙур эш башҡарғанһығыҙ, учалылар! Эштәрегеҙ уң, үҙегеҙ имен-һау булығыҙ!» – тине осрашыуҙа ҡатнашыусылар.
