Мөслимәләр килде Сәйғәфәргә
Мөслимәләр килде Сәйғәфәргә
Тыуған ауылым Баймаҡ районындағы Сәйғәфәр ауылы тураһында яҙып үтмәксемен. Хәҙерге ваҡытта беҙҙә бөтәһе 206 хужалыҡ, 40 өй буш тора, йәмғеһе 270 кеше йәшәй. Ауылда эш юҡлыҡтан күп йәштәр ҡырға китеп эшләргә мәжбүр.
Тик халыҡ бирешмәй: күпләп мал аҫырайҙар, балалар үҫтерәләр. Ауылда 2 фермер хужалығы, 1 билмән цехы, 1 таҡта ярыу цехы, 4 магазин, урта йыллыҡ мәктәп, балалар баҡсаһы, медпункт, мәҙәниәт йорто эшләп килә, әлхәмдүлилләһ!
Ауылыбыҙҙан 4 фән кандидаты, бихисап арҙаҡлы шәхестәр бар.
Беҙҙең ауыл яҙыусылары: Фирҙәүес Мырҙабулатова, Фирүзә Алсынбаева, Әлифә Юнысбаева, Нәркәс Алсынбаева. «Ватандаш» журналының баш мөхәррире Рәшиҙә Мәһәҙиева ла беҙҙең ауыл шәхесе.
Ауылыбыҙ тураһында «Әптекәйҙә ил яҙмышы», «Сәйғәфәр» тигән китаптар сыҡты. Тарихсыбыҙ Рәүил Назаров (Йәне йәннәт түрендә булһын!), бик күп көс һалып, беҙҙең ауылға 250 йыл элек нигеҙ һалыныуын дәлилләне, шәжәрә тамырҙарын барланы. Айһылыу Сәләхова етәкләгән мөслимәләр берлегендә «Иманға баҫҡан юлым» исемле китап донъя күрҙе.
Ауыл халҡы йәмәғәт эшендә әүҙем ҡатнаша. Төрлө мәҙәни, дини, донъяуи саралар үткәрелеп тора. 2023 йыл «Айыҡ ауыл» бәйгеһендә 3-сө урын алып, тағы ла дәртләнеп донъя көтөләр.
Әле яңыраҡ ауылда хажиә Айһылыу Сәләхованың тотош Башҡортостан буйынса ойошторолған һигеҙ айлыҡ «Ислам дине нигеҙҙәрен өйрәнеү һәм Ҡөрьән һабаҡтары» исемле дистанцион уҡыуҙы уңышлы тамамлаусыларҙың йыйыны үтте. Был сара «Нур» мәсетендә имам-хатиб Ишбулат хәҙрәттең фатихаһы менән уҙғарылды. Алыҫ араларҙы яҡын итеп сараға Айһылыу Сәләхованың интернет селтәре аша уҡыған мөслимәләре йыйылды. Бөтәһе 15 район берләште: Силәбе өлкәһенән, Өфө, Сибай ҡалалары, Баймаҡ, Мәсетле, Мәләүез, Хәйбулла, Учалы, Ишембай, Стәрлебаш, Белорет, Ауырғазы, Ейәнсура, Ҡырмыҫҡалы, Балаҡатай райондарынан килделәр. Көндөң ямғырлы, һалҡын булыуы ла кәртә була алманы. Әйткәндәй, Айһылыу Сәләхова ойоштороуында курсты тамамлаусыларға бындай « Шәһәҙәтнамә» тапшырыу бишенсегә үткәрелә.
