Мәсеттәр – ауыл ҡото!
Мәсеттәр – ауыл ҡото!
Хаҡлы ялға сыҡҡан мәлем. Ауылыбыҙҙа шаҡ ҡатырлыҡ мәғәнәһеҙлек башланып китте: совхоздар бөттө, эшһеҙлек, эскелек, урам-ара һуғыш, йән ҡыйыуҙар...
Ғүмер буйы тәртип һаҡлап, балалар уҡытып өйрәнгән миңә ауыр булды, шул күренештәр эсте бошорҙо. Мәсеткә йөрөй инем йомаларҙа, унда ла мәғәнәһеҙлек тойоп (ул ғибәҙәтхана элекке ауыл советы бинаһында, араҡы магазинына ҡаршы ултыра, тәҙрәһенән күҙгә урамда һәлдерәшеп йөрөгән заттар, яман тауыштар һәм башҡалар салынғас, күңелгә ныҡ ауыр ине).
Бер Ураҙа ғәйете көнө райондан хужалар килде. Мин һүҙ алып: «Әйҙәгеҙ, яңынан мәсет төҙөйөк, дөрөҫ итеп ҡиблаға ҡаратып», – тинем. Төрлө фекерҙәр ишеттем, күбеһе ярай, тип риза булды. «Был мәсеткә лә кеше бик йөрөмәй, нимәгә ул? Күп сығымды ҡайҙан алаһың?» – тиеүселәр ҙә булды.
Әлхәмдүлилләһ, комиссия төҙөп, эшкә тотондоҡ. Ветерандар советы рәйесе Рушат ағай Амантаев төҙөлөш етәксеһе булды. Урын һайланыҡ, клубта ауыл сходы үткәрҙек, төҙөлөш өсөн һәр бер йорттан аҡса йыйҙыҡ. Аҡсаһыҙ кешеләр үҙ көсө, ярҙамы менән ҡул ҡамыт итте.
Ауылдашыбыҙ Тәлғәт Атанов блоктан эшләйек, улай тиҙерәк була, тигәс, риза булдыҡ. Шөкөр, 2010 йылдың сентябрендә мәсеткә нигеҙ һалырға йыйылдыҡ. Ҡаҙырша ауылынан Нуретдин Игебаев олатай нигеҙгә һалырға таш өшкөрөп ебәрҙе. Буласаҡ мәсет урынында аят уҡып, эш башланды. Ҙур ауырлыҡ менән яйлап, дүрт йыл төҙөлдө ул. Оло сабырлыҡ менән ауыл халҡын ярҙамға әйҙәп, саҡырып эш иттек. Рушат ағай һәр урамдан кем килгәнен көн дә билдәләп барҙы. Прораб булып Сәхиулла Моталлапов эшләне. Илдар Шәрипов, Рәфит Шакиров, Иршат Саптаров һәм башҡалар әүҙем булды, төҙөүсе эшен етәкләне, изге эшкә күп көс һалды. Ситтә йәшәгән ауылдаштар, туғандар, балаларыбыҙ аҡса яғынан ярҙам итте. Аллаһҡа шөкөр, элек төҙөлөштә эшләгән ҡатындар ҙа ҙур өлөш индерҙе.
Күмәкләгән яу ҡайтарған тигәндәй, мәә шәә Аллаһ, мәсетебеҙ ҡалҡып сыҡты. Мин һәр саҡ сирлә-гәс, ул мәсеттең төҙөлөп бөтөүен күрә алһам ине, тип хыялландым, Раббынан һораным. Аллаһҡа мең шөкөр, мәсетебеҙгә быйыл ун йыл булып китте, күңелдә тик шатлыҡ-ғорурлыҡ! Ауылдашыбыҙ Шамил Сәрҙән улы Биктимеровтан (ул инде мәрхүм, Йәннәт әһеле булһын, ин шәә Аллаһ!) мәсеткә бик ҙур ярҙам булды, ул төҙөлөшкә йөҙ мең аҡса бирҙе. Әсәһе Зәйтүнә Һиҙиәт ҡыҙы бер газель машина тулы гөл һауыттары, ҡашығаяҡ, сынаяҡ, мәсеттә эшләгән ҡатындарға төрлө пластик һауыттар килтерҙе.
Раббыға мең шөкөр, күп көс, тырышлыҡ менән мәсетебеҙ эшләп тора, халыҡ ихлас йөрөй, даими камиллаша. Әле быйыл район кимәлендә иң яҡшы мәсет тип танығандар. Ул минең өсөн ҙур шатлыҡ, оло баһа! Өфөлә йәшәһәм дә, күңелем ауылымда! Инде имам Данияр Байназаровҡа, мәсетте тәртиптә тотоусы ҡатындарға оло рәхмәтемде еткерәм. Имен-һау булығыҙ! Мәсеттәребеҙ (ауылыбыҙҙа ике ғибәҙәтхана) ауылдың ҡотон, иманын һаҡлап оҙаҡ торһондар! Йәштәрҙе, балаларҙы күберәк йәлеп итеп, әүҙем булырға яҙһын! Иҙрис хәлфә исемен йөрөткән аҫҡы мәсетебеҙ ҙә матур эшләй, йома көндө икеһендә лә халыҡ күп, Әлхәмдүлилләһ! Ауылдаштарыма оло рәхмәт, ауылдың ҡотон, йәмен һаҡлап йәшәгеҙ!
