Кесе хажға юллама
Кесе хажға юллама
Һәр йортҡа иман нуры, бәрәкәт алып килгән «Әс-Сәләм» дин-мәғрифәт гәзитенә яҙылыу дауам итә.
Үткән айҙа Сибай ҡалаһында уҙған дини мәжлестә дәғүәт эшендә әүҙемлек күрһәткән ике дин ҡәрҙәшебеҙгә бәләкәй хажға юлламалар бүләк ителде.
Баймаҡ ҡалаһы һәм районы буйынса 800 гәзит яҙҙырып таратыуға ирешкән Рәмилә Сәфәрғәле ҡыҙы Бәхтиеваға ғөмрәгә юлламаны Дағстан Республикаһы мөфтиәтенең Башҡортостандағы вәкиле Мөхәммәд Мансуров бүләк итте.
«Әгәр Аллаһу Тәғәләнең ярҙамы булмаһа, беҙ бер ниндәй эште лә килтереп сығара алмаҫ инек, – тине Мөхәммәд хажи. – Шуға ла һәр эштә, Мәүлит мәжлестәре үткәреү булһынмы, «Әс-Сәләм» гәзитенә яҙҙырыу булһынмы − ихласлыҡ кәрәк. Дәғүәт эшендә ул бигерәк тә мөһим. Әгәр ихласлыҡ булмаһа, кеше күрһен, маҡтаһын өсөн эшләнһә, киләһе тормошта беҙҙе сауап түгел, киреһенсә, яза көтә.
Беҙҙең арала фәҡәт Аллаһ ризалығын өмөт итеп, шым ғына ҙур эштәр башҡарып йөрөгән ҡәрҙәштәребеҙ бар. Шундайҙарҙың береһе − ошо бәрәкәтле төбәктең 40 ауылына сығып, дин тураһында аңлатыу эштәре алып барған Рәмилә ханым Бәхтиева».
«Уның башҡарған хеҙмәте баһалап бөткөһөҙ. Беҙ Рәмилә Сәфәрғәле ҡыҙынан өлгө алабыҙ. Беҙҙең баҫмабыҙ биттәрендә лә Рәмилә ханым үҙенең эш тәжрибәһе менән бер нисә тапҡыр уртаҡлашҡаны булды. Күркәм иманлы, төплө аҡыллы, юғары рухлы шәхес ул!» – тине башҡорт телендә сыҡҡан «Әс-Сәләм» гәзитенең мөхәррире Зөлфиә Ханнанова.
Әйткәндәй, кесе хажға юллама Зөлфиә Миңдебай ҡыҙының үҙенә лә бүләк ителде. Уны Дағстан мөфтиәтенең «Әс-Сәләм» гәзитен таратыуҙы ойоштороу буйынса Башҡортостандағы вәкиле Шамил Әлиев тапшырҙы.
