Ураҙа байрамы менән!
Ураҙа байрамы менән!
Әс-сәләмү ғәләйкүм үә рахмәтуллаһи үә бәракәтүһ!
Ҡәҙерле дин ҡәрҙәштәр!
Һеҙҙе ихлас күңелдән Ураҙа ғәйете менән ҡотлайым! Изге Рамаҙан айында барса диндарҙар, Аллаһу Тәғәлә ҡушҡанды үтәп, ураҙа тотто, тәрәүих намаҙҙарын үтәне. Ғаләмдәр хужаһына мосолман ҡәрҙәштәребеҙҙе бәлә-ҡазаларҙан һәм төрлө ҡыйынлыҡтарҙан аралауын үтенеп доға ҡылды. Үҙ мөлкәтен хәйриә эшенә тотондо, бер-береһенә ҡунаҡҡа йөрөштө, дини ғилемдәре менән ихлас уртаҡлашты, эргә-тирәләге һәр кемдең күңелендә изгелек һәм берҙәмлек осҡондарын тоҡандырҙы.
Рамаҙан – рухи камиллыҡҡа өлгәшеү, мәрхәмәтле һәм миһырбанлы булырға ынтылыу миҙгеле. Был изге айҙа Раббыбыҙ бәндәләренә оло рәхимлек күрһәтә. Шуға ла беҙ, был айҙы оҙатҡанда, гонаһ-хаталыҡтарыбыҙҙың кисе-релеренә ҙур өмөт бағлайбыҙ. Изге ниәттәребеҙҙе тормошҡа ашырғанда, фәҡәт Уның ярҙамына ғына таянасағыбыҙҙы беләбеҙ, сөнки, ысынында, Аллаһҡа ﷻ тәүәккәл ҡылғандар башҡа бер кемдең дә ярҙамына мохтаж түгел.
Аллаһу Тәғәлә барыбыҙҙың да изге доғаларын, тотҡан ураҙаларын ҡабул ҡылһын, Үҙенең бөйөк йомартлығына һәм ризалығына ирештерһен. Ошо изге айҙа беҙгә һалынған барса ыңғай үҙгәрештәр ғүмер аҙағынаса һаҡланһын. Амин!
