Әлегә һуң түгел!
Әлегә һуң түгел!
Бай кеше тәҙрәһенән сүп-сар контейнерында соҡсонған ярлыны күреп ҡала ла эстән генә: "Аллаһҡа шөкөр, фәҡир түгелмен", – тип һөйөнә. Ярлыһы иһә ян-яғына ҡаранһа, үҙен ныҡ әҙәпһеҙ тотҡан шәрә кешене шәйләп ҡала һәм шөкөрана ҡыла: "Был бисара кеүек аҡылдан яҙмағанмын, Раббым, мең рәхмәт Һиңә!"
Был тиленең күҙенә ҙур тиҙлектә доноп барған ашығыс ярҙам машинаһы салынып ҡала, һәм ул: "Әлхәмдүлилләһ, мин сирләмәйем", – тип һөйөнә.
Дауаханаға килеп еткән ауырыу моргҡа табан юл тотҡан мәйет һалынған арбаны күреп ҡала ла шым ғына: "Аллаһҡа шөкөр, үлмәнем, тере ҡалдым", – тип бышылдай.
Тормошто яҡшыраҡ аңлау өсөн, беҙгә дүрт урынды – дауахананы, психиатрия бүлеген, төрмәне һәм зыяратты – күҙ алдынан үткәреп, байҡап сығырға кәрәктер. Тәүгеһендә беҙ һаулыҡтан да гүзәллерәк нәмә юҡлығын аңларбыҙ. Төрмәлә иректең иң ҡиммәтле нәмә икәнен күрербеҙ. Ҡәберлектә беҙ тормоштоң фани ғына булыуына, бер ни тормауына төшөнөрбөҙ. Бөгөн ер өҫтөнән йөрөйбөҙ, иртәгә ул, кәүҙәбеҙҙе үҙенә һыйындырып, беҙгә кәфенлек булыр.
Бары тик мәрхүм кешенең генә нимәнелер үҙгәртергә, Аллаһҡа шөкөр итергә мөмкинлеге юҡ. Ни өсөн беҙгә был турала уйланмаҫҡа? Әйҙәгеҙ, тәүбәгә киләйек, беҙҙе, был донъяны юҡтан Бар Итеүсе Ғаләмдәр Хужаһына бай, имен, тыныс, рәхәт тормошобоҙ өсөн рәхмәтебеҙҙе белдерәйек, яман ғәҙәттән арынырға, иҫән сағыбыҙҙа Раббыбыҙ, Пәйғәмбәребеҙ ﷺ күрһәткән юлдан тайпылмайса барырға ниәтләйек. Әлегә һуң түгел! Һуң түгел!
Светлана Ғәлиуллина тәржемә итте
