Яңы йылға – яңы маҡсаттар!
- Маҡсатһыҙ йәшәмәгеҙ. Эштәрегеҙҙең дә беренсе сиратта шул маҡсатҡа ғына хеҙмәт иткәнен ҡалдырығыҙ. Әллә күпме кәрәкһеҙ эштән ҡотолорһоғоҙ.
- Үҙегеҙҙе булдыҡлы, аҡыллы, уңышлы тип хис итегеҙ. Әлеге һәләт эште планлаштырғанда ла, уны башҡарғанда ла ярҙам итәсәк.
- Бына-бына тотонасаҡ эшегеҙ тураһында һөйләүҙән тыйылығыҙ. Алдан ҡысҡырған кәкүктең башы ауырта.
- Зарланыу, үҙ-үҙегеҙҙе ҡыҙғаныуҙан туҡтағыҙ. “Эх, шулай эшләгән булһам...” тигән шарт һөйкәлешен дә онотоғоҙ!
- Эшкә тотоноу өсөн уңайлы ваҡыт көтмәгеҙ. Алдағы дүшәмбе, сираттағы йома ла үтә лә китә ул. Иң һәйбәте – бөгөн башлау.
- Күп уйламағыҙ! Уйлаған һайын кеше икеләнә, икеләнгән һайын тәүәккәллек кәмей. Шуға күрә башығыҙға ниндәйҙер уй килгән икән, эшләгеҙ. Һис юғы эшләп ҡарағыҙ. Бәлки, килеп сығыр!
- Кибеттә исемлекһеҙ йөрөмәгеҙ. Аҡсағыҙ ҙа артыҡ сыҡмаҫ, ваҡытығыҙ ҙа әрәм булмаҫ.
- Телевизор тигән ваҡыт урлаусы “тартма”нан ҡотолоғоҙ.
- Кешеләр менән һайлап аралашығыҙ. Маҡсаты булмағандар башҡаларҙың ваҡытын урлай.
- “Юҡ” тип әйтә белегеҙ. Был ваҡытты юҡ-барға сарыф итмәҫкә ярҙам итә.
- Ниндәй эшкә тотонһағыҙ ҙа, иң башта үҙегеҙҙән: “Был миңә кәрәкме?” – тип һорағыҙ. “Юҡ” тигән яуаптың ни ҡәҙәр йыш булыуын күреп шаҡ ҡатырһығыҙ.
- Көн ахырында теге планығыҙҙы тағы бер ҡат барлап сығығыҙ – ниҙәр эшләнгән, ниҙәр юҡ?
- Бер тәүлектә 24 сәғәт ваҡыт бар. Әммә ғүмер тигәнең тиҙ уҙа – үкенерлек булмаһын!
(Интернет селтәренән)
