Таш ҡабаҡтан икра
Таш ҡабаҡтан икра
Таш ҡабаҡ сезоны дауам иткәндә, ябай ғына икра рецебын тәҡдим итәм.
• таш ҡабаҡ - 3 кг
• һуған -800 гр
• кишер - 800 гр
• томат соусы - 270 гр (3,5 аш ҡалағы)
• тоҙ - 1 аш ҡалағы
• шәкәр - 2 аш ҡалағы
• борос - 1 балғалаҡ
• тәмләткестәр теләк буйынса (паприка, карри - 1 аш ҡалағы)
• көнбағыш майы - 250 гр
• аш һеркәһе 9% - 2 аш ҡалағы
Таш ҡабаҡты, һуғанды, кишерҙе турайбыҙ. Айырым һауытҡа көнбағыш майы ҡойоп, башта һуғанды, аҙаҡ кишерҙе ҡыҙҙырып алабыҙ. Таш ҡабаҡты ҙурыраҡ һауытҡа һалып, кишер менән һуғанды өҫтәйбеҙ. Көнбағыш майы ҡоябыҙ. Ҡайнап сыҡҡансы уртаса, аҙаҡ талғын утта яҡынса 1 сәғәт быҡтырабыҙ (бөтә йәшелсәләр ҙә иҙелеп бешергә тейеш). Ваҡыт-ваҡыты менән яҡшылап болғатып торабыҙ.
Томат пастаһы һалып, тағы ла 20 минут ҡайнатабыҙ. Лайфхак: томат пастаһы һалғас, төбөнә тиклем болғатмаҫҡа, юғиһә паста йәбешеп көйә. 10 минут үткәс кенә яҡшылап болғатабыҙ.
Тәмләткестәр өҫтәйбеҙ (тоҙ, борос, шәкәр, паприка). Бер нисә минут ҡайнағас, утты һүндерәбеҙ.
Артабан блендер менән пюре булғансы туғыйбыҙ (4-5 минут). Блендерға бер аҙ ял биреп торорға ла онотмағыҙ.
Икраны йәнә утҡа ҡуябыҙ. Ҡайнап сыҡҡас, аш һеркәһе һалып, талғын утта 5-7 минут ҡайнатабыҙ. Иҫкәрмә: ҡапҡасын ябыҡ тоторға! Икра сәсрәп ҡайнай торған.
Ул арала банкаларҙы стерилләштереп, икраны эҫе килеш ҡойоп сығабыҙ. Баштүбән ҡуйып һыуытабыҙ, һуңынан баҙға йә һыуытҡысҡа оҙатабыҙ.
Аштарығыҙ тәмле булһын!
