«СӘСКӘ» БӘЛЕШЕ
Ҡамыр өсөн:
300 мл йылы һөт
2 йомортҡа
2 балғалаҡ ҡоро сүпрә
80 г шәкәр
50 г көнбағыш майы
50 г аҡ май (иретергә)
ванилин (теләк буйынса)
семтем тоҙ
500-550 г он
Эслек өсөн:
300 г сәтләүек
100 г шәкәр + май, 1 йомортҡа һарыһы һәм кунжут емештәре (теләк буйынса)
Йылы һөткә сүпрәне, тоҙҙо, майҙарҙы ҡушып болғатырға. Шәкәрҙе йомортҡалар менән бер аҙ туғып, һөткә ҡойорға. Иләнгән ондо ҡуша-ҡуша, йомшаҡ ҡамыр баҫырға. Ҡамырҙы 1-1,5 сәғәткә йылы урынға ҡуйып торорға.
Эслек өсөн сәтләүекте (мин грек сәтләүеге менән арахисты алдым) блендер менән ваҡларға, шәкәр ҡушып болғатырға. Тәғәйен ваҡыт үткәс, ҡамырҙы 3 өлөшкә бүлергә. 1-се ҡатты йәйеп, өҫтөнә шыйыҡ һары (аҡ) май һөртөргә. Эслектең яртыһын һалып тигеҙләргә. 2-се ҡатты ла шулай эшләргә. 3-сө ҡат менән ҡаплап, сит яғын тоташтырырға.
Бәлеште 16 тигеҙ өлөшкә бүлергә. Һәр икеһен 2 тапҡыр өйөрөлтөп, сәскә япраҡтары эшләп сығырға. 15 минутлап ял биргәс, бәлештең өҫтөн йомортҡа һарыһы менән һылап, уртаһына кунжут емештәре һибергә.
180 градусҡаса ҡыҙған мейестә 25-35 минут бешерергә.
Байрам табынының йәме булырҙай бәлеш әҙер. Сәйҙәрегеҙ тәмле булһын!
