Доға булып осто йөрәк һүҙе!
Быйыл уҙғарылған “Йөрәк һүҙе. Рәми” бәйгеһе изге Рамаҙан айына тура килде. Башҡортостандың атҡаҙанған сәнғәт эшмәкәре Наилә Сәфәрғолова етәкләгән эш төркөмө был сараны иҫ киткес юғары кимәлдә әҙерләгәйне. Сәхнәләге оло экрандан ихлас йылмайған мәшһүр шағирыбыҙ Рәми Ғарипов портреты, бәйгеселәр иңенә ябылған сигеүле таҫтамалдар, йәрәбә һалғанда ҡулланылған ҡымыҙ тулы кәсәләр – барыһы ла эске аңда милли рухты уятыуға көйләнгәйне. Әлхәмдүлилләһ, ураҙа тотоусыларға ауыҙ асыр өсөн ифтар табыны ла күҙ уңынан ысҡындырылмаған.
Ә инде тамашаның иң матур биҙәге – ҡатнашыусылар. Быйыл сәхнәлә бер юлы 10 ир-егеттең майҙан тотоуы бик мәртәбәле булды. Ирҙәр менән яраш йөрәк һүҙен әйтергә батырсылыҡ иткән ике генә бөртөк ҡатын-ҡыҙҙың Зөбәржәт Утарбаева һәм Алина Шәрипованың да сығыштары һәр саҡ дәррәү алҡыштарға күмелде.
Минеңсә, шиғыр бәйгеһе генә булманы был байрам. Ҡатнашыусыларҙың, Рәми традицияһын дауам итеп, илем, ерем, телем, тип янған сығыштары изге рамаҙан айында берсә доға булып, күккә күтәрелде, берсә нәсихәт булып, йәндәрҙе сафландырҙы, берсә оран булып, милли рухты нығытты.
Был бәйгелә Рәми Ғарипов төйәгендә, Башҡортостаныбыҙҙың төньяҡ-көнсығышында, донъяға килгән, Рәми Ғарипов исемендәге гимназияны тамамлаған, Башҡорт дәүләт академия театры сәхнәһендә Рәми образын тыуҙырған Артур Кәбировтың беренсе урын яулауы бик урынлы булды. “Йөрәк һүҙе.
Рәми” бәйгеһендә ҡатнашыу – минең өсөн намыҫ эше ине. Урын алыр өсөн ҡатнашманым, Рәми Ғарипов шәхесен сикһеҙ хөрмәт иткән өсөн ҡатнаштым”, – ти еңеүсе. Икенсе урынды гүзәл зат Зөбәржәт Утарбаева, өсөнсө урынды Нияз Замалетдинов яуланы. Тамашасылар һөйөүе номинацияһында лайыҡлы рәүештә Урал Таһиров билдәләнде.
“Әс-сәләм” гәзитендә “Аш-һыу серҙәре” рубрикаһын алып барыусы иманлы ҡатын-ҡыҙ Зөбәржәт Утарбаеваның еңеүе өсөн беҙ икеләтә ҡыуандыҡ.
Зөбәржәт сығышы менән Баймаҡ районы Сосновка ауылынан. Бала саҡтан йыр-моңға, шиғриәткә ғашиҡ ҡыҙҙа ғүмерен уҡытыуға бағышлаған әсәһе Фәриҙә Әхәт ҡыҙы мәктәп йылдарынан фәнгә ҡарата да оло һөйөү уятыуға ирешкән.
9 синыфта «Урал батыр» эпосын ятлап, республика конкурсында ҡатнашыуы киләсәктә башҡорт теле һәм әҙәбиәте юлын һайлауға этәргес биргән. Тыуған ауылы мәктәбен көмөш миҙалға, БДУ-ның Сибай институтының педагогия факультетын ҡыҙыл дипломға тамамлап, БДУның аспирантураһында белем алған. Сәсәндәр ижады традицияһына арналған диссертация эшен яҡын арала яҡлап ҡуйырға ниәтләй. Зөбәржәт Әбйәлил килене. Хәләл ефете Тимерйән менән бергә Бәхтийәр һәм Мәрйәм исемле ике бәпес үҫтерәләр. Декрет ялына тиклем Сибай телевидениеһында, «Йома» тапшырыуында, БДУ-ла эшләгән.
Бешеренергә, тегенергә яратыуы, декрет ялында үҙен башҡорт фудблогеры булараҡ үҫтереүгә булышлыҡ итә. Социаль селтәрҙәрҙә хәҙер күптәр уны Уңған килен Зөбәржәт тип белә. Хыялы – үҙебеҙҙең телевидениела тәмле-тәмле рецепттарҙы күрһәткән матур тапшырыуҙы булдырыу. Мәртәбәле “Йөрәк һүҙе”ндә ҡатнашыу ҙа – күптәнге хыялым ине.
Ғөмүмән, был тормошта, теләк һәм тырышлыҡ булғанда, барыһына ла ирешеп була, тигән девиз менән йәшәйем. Ҡатнашасағымды белгәс тә, етди әҙерләндем. Минең өсөн ниндәй ҙә булһа урын алыу түгел, ә тамашасы күңеленә үҙемдең йөрәк һүҙемде еткереү мөһим ине. Аллаһҡа шөкөр, шул маҡсатыма ирешә алдым. Мин бик шатмын! – ти Зөбәржәт Утарбаева.
ЗӨЛФИӘ ХАННАНОВА
