Күркәм холоҡ – ярты бәхет

Үткәндәргә һис үпкә юҡ,

Үткәндәр сыныҡтырҙы.

Сымырылыҡҡа өйрәтте

Бер илаҡ ҡына ҡыҙҙы.

Ҡанда булмағас ҡатылыҡ,

Яһиллыҡ та бер тамсы,

Гел үҙемә эләгеп торҙо

Арҡа һыҙырыр ҡамсы...

Күркәм холоҡ – ярты бәхет,

Йәшәү өндәүем – ошо.

Кеше күң(е)лен ҡалдырмағас,

Иңемдә – бәхет ҡошо.

Йөҙ йыртып, бит тырнамайым,

Тәүбә, Раббым һаҡлаһын!

...Үҙ күңелем ҡалһа ҡалһын,

Бәндәнеке ҡалмаһын...

Үткәндәгә һис үпкәм юҡ,

Үткәндән һабаҡ үрҙем:

Минең телдән һис ҡасан да

Йәбер күрмәһен бер кем!

Айзилә Мортаева,

Өфө ҡалаһы