Рухыңды көйлә

Бер гөнаһһыҙ, тип үҙеңде
Әйтмә инде, әҙәм көлөр.
Аҡылына зирәк бәндә
Шуны белер, шуны белер:
Үҙ-үҙеңде еңер өсөн
Ҡеүәт һиңә – доға көсө.
Ҡиблаға йүнәлт йөҙөңдө,
Һин бит кеше, һин бит кеше.
Тик шуныһы: берәү өсөн
Гөнаһ – урлау, йә йән ҡыйыу

Ә берәүгә – үҙ тәҡдирен
Тапмайынса юлдан тайыу.
Һәр кем үҙ һынауын тотор,
Ут-һыу аша булыр беше.
Рухыңды көйлә намаҙҙа,
Һин бит кеше, һин бит Кеше!

ТАМАРА ИСКӘНДӘРИӘ