Яңы йыл
Бер йыл барған үҙ хакимлығын
Иҫке йылым бирә Яңыға,
Барлай быйыл эшләгән эштәрен
Бүлеп уны яҡшы-яманға.
Ҡайһы яғы ауыр булыр уның –
Бары Раббым ғына беләлер.
Беҙгә килә торған Яңы йылға
Шатлыҡ, бәхеттәрен бирәлер.
Барлыҡ яман эштәр артта ҡалһын,
Күсһен Яңы йылға яҡшылыҡ.
Раббым һалған Иман нурҙарынан
Керһен күңелдәргә яҡтылыҡ!
Изгелектәр булһын уйыбыҙҙа
Яңы йылға аяҡ баҫҡанда,
Фәрештәләр яҡшы билдә ҡуйһын
Ғәмәл дәфтәрҙәрен яҙғанда.
