Рамаҙан килде
Хатта ҡояш та йылмайҙы,
Күңелгә шатлыҡ тулды.
Һөйөнәйек, эй ҡәрҙәштәр,
Рамаҙан айы килде!
Дуҫтар, беҙ сәхәр торайыҡ,
Ҡөрьән хәтем ҡылайыҡ,
Шайтандарҙы беҙ ҡыуайыҡ,
Рамаҙан айы килде!
Ғәфләт ваҡыты түгел ул,
Нәфрәт айы түгел ул.
Аллаһ рәхмәтен яуҙырған
Рамаҙан айы килде!
Йомартлыҡ айы булған,
Төндәре яҡты булған,
Хәҡиҡәт ялғанды еңгән
Рамаҙан айы килде!
Тотонайыҡ беҙ тәғәткә,
Өҫтәмә ғибәҙәткә;
Өлгәшәйек сәғәҙәткә.
Рамаҙан айы килде!
Рамаҙанда сабыр бар;
Ете мең ҡат әжер бар;
Мең айға тиң Ҡәҙер бар.
Рамаҙан айы килде!
Батырҙар айы Рамаҙан;
Кемдәр ураҙа тотҡан −
Шуларҙы көтә Райан.
Рамаҙан килде, Рамаҙан!
Ҡотло булһын был ай беҙгә;
Мөбәрәк булһын һеҙгә;
Оло байрам бөтәбеҙгә –
Рамаҙан килде, Рамаҙан!
